Wir Emch von Altzay probst ze Werdse, Fridrich von Walse, Chunrad der purgraf von Sewsenekke, Rueger von Zauche vnd Alram von Rikkerstorf tu^on chunt vnd veriehen allen den die disen brief sehent oder hoerent lesen, daz wir gemainlich alle fumf habn verschaiden vnd verrihtet vnsern herren bischof Chunraden von Frising vnd hern Berchtold von Losenstain vmb alle die sache die si mit einander ze schaffen vnd ze handeln heten ald ir diner, vmb swelich sache daz was, an vmb vischwaide, an ligent gu^ot, an lehen vnd an buergschaft, dar vmb habn wir nihts geschaiden noh berihtet, noch ward auch dar vmb nihtes an vns gesetzet, vmb ander sache vnd vorderung die si gen einander heten, dar vmb habn wir su (!) berihtet vncz vf den hevtigen tag, daz baidenthalb allev vorderung ab sol sin. Wir habn auch verrihtet vnd vertaidingt Chu^onrats saeligen chinder des Zauchingers, sin brueder vnd ander sin frevnde vmb den toedeslag Chu^onrats saeligen des Zauhingers ||
vnd vmb alle vintschaft dev si heten gen des vorgenanden bischof Chu^onrats dinern, gen sinen burgern ald gen andern sinen luten vnd sint dar vmb aller der frevnde worden, der vinte si dar vmb worn vnd gen den si vintschaft heten, vnd habnt daz gelobt bi ir triwen an aides stat. Chu^onrats des Zauhingers saeligen brueder vnd sin sun hant auch verhaizzen vnd verlobt bi ir triwen, swenne Chunrats saeligen chinder zv ir tagen choment, daz su mit inen schaffen sullen, daz su auch frevnde werden vmb ir vater vnd vmb alle vintschaft. Si hant auch verhaizzen vnd gelobt bi ir triwen, swenne Chu^onrats sa\eligen brueder Pilgrim wider ze lande chome, daz si schaffen sullen, daz er auch frevnde werde vmb alle vintschaft als auch si worden sint, wolde er des niht tu^on, so sullen si im vnbeholfen sin noch zv^o legn. Wir habn auch verschaiden, daz vnser herre der obgeschriben bischof Chu^onrad sol gebn Chu^onrats sa\eligen chinden des Zauhingers sechs vnd drizzig pfunt alter Wienner daz ir aines beraten werde, die pfenning er in auch hat vergwisset vnd gu^ot gemachet da wir alle fumf bi worn. Daz habn wir allez verschaiden vnd berihtet alle fumf vnzerworfenlich, wan si vns baidenthalb ze schiedluten vnd gemainen luten dar zv^o namen, mit ir guetlichem willen. Daz daz allez daz hie vorgeschriben stat, gantz, staet vnd vntzebrochen belibe, dar vmb habn wir disen brief besigelt mit vnsern insigeln. Der brief ist gebn ze Sitansteten, do von Christes gebuertte worn drevtzehen hundert jar vnd dar nach in dem newn vnd zwainczkisten jar, des naechsten Samtztages vor dem Suntag so man singet Judica.

Source Fulltext: ZAHN, Codex Diplomaticus (=FRA II/35, Wien 1871) S. 175-176