Allen den die disen brief sehent oder hoerent lesen, chunde ich Ott der Tewuel vnd Alhait min hausvrowe daz wir habn verchouffet vnd gebn vnserm gnaedigen herren bischof Chunrad ze Frising vnd sinem gotshuse vnser lehen datz Trautmansperg daz wir von im vnd sinem gotshuse ze lehen heten, vnd habn im vnd sinem gotshuse daz selb lehen vf gebn vnd swaz dar zv^o geho^ert, besu^ocht vnd vnbesu^ocht, swo ez gelegn ist, vnd habn von im vnd von sinem gotshuse vmb daz vorgenante lehen enpfangen vier vnd zwaintzk pfunt Wienner vnd sin der gar vnd gaenczlich von im vnd von sinem gotshuse ze Frising gewert vnd habn vns verczigen aller der rechten dev wir hetten ald habn mochten zv^o dem vorgeschribenn lehen ze Trawtmansperg, vnd suˆllen nimmer mer dhain ansprache noch vorderung dar zv^o gewinnen. Wan ich Ott der Tewuel niht aygens insigels han, so habn ich vnd min hausvrowe gebeten hern Alramen von Rikestorf, hern Wernharten von Schaffenvelt, Chunraten den Prater, Hermannen den Hewsib vnd Chunraten von Pu^ochaw^en daz si irev insigel zv^o einem vrchunde der worhait veber allev dinch dev hie vorgeschriben stant, henchen an disen prief. Ich Alram von Rickerstorf ritter, Wernhart von Schaffenvelt, Chu^onrat der Prater, Herman der Hewsib vnd Chu^onrad von Pu^ochawe veriehen, daz wir durch pet Otten des Tewuels vnd siner havsvrowen Alhaiten vnserev insigel an disen brief gehenget habn zv^o einem vrchunde der worhait. Der brief ist gebn ze V^odemaruelt do von Christes gebuertt worn drevczehen hundert jar vnd dar nach in dem newn vnd zwainczkisten jar, an dem naechsten Samtztag nach sant Philippes vnd sant Jacobs tag.

Source Fulltext: ZAHN, Codex Diplomaticus (=FRA II/35, Wien 1871) S. 176-177