Ich^a Herman von Landenberg sesshafft ze Werdegg² ritter tun kunt vnd vergich offenlich mit disem brief allen den, die in ansehent oder horent||
lesen, daz ich mit guter vorbetrachtung vnd mit wolbedahtem mut nach rât erberer wiser luten vnd miner guter frunden fur||
mich vnd min erben recht vnd redlich ze koffenn geben hân den nachbenempten erbern luten burgern ze Rapreschwil³ vnd iren erben||
des ersten Arnolten Wissling an einem teil vnd darnach Herman Kolomotzen vnd Annen siner elichen wirtin an dem andern teil minen leygen zehenden ze Pfaffikon⁴ mit allen rechten gewonheiten vnd zugehorden, als ich vnd min vordern den selben zehenden vntz her inne gehebt vnd genossen hant, fur lehen von miner gnadigen herrschafft von Osterrich, vnd herumb han ich von inen enpfangen funffthalb hundert guldin guter vnd gaber an gold vnd an gewicht, die in minen guten nutz komen sind, won ich grossern schaden damit furkomen han vnd gewendet. Des vorgenanten geltz hât mir Arnolt Wissling gewert zweihundert funf vnd zweintzig guldin, so hant mir Herman Kolomotz vnd Anna sin elichi wirtin ôch gewert zweihundert vnd funf vnd zweintzig guldin, vnd darumb so han ich mich gantzlich vnd lûterlich entzigen fur mich vnd min erben aller eigenschafft lehenschafft rechtung vordrung vnd ansprach, so ich oder min erben ald ieman von vnsern wegen zu dem vorgenanten zehenden oder zu deheinen rechtungen, so darzu gehorent, iemmerme gehaben mohtint oder gewinnen mit geischlichen oder weltlichen gerichten ald an gericht in dehein weg nu oder hienach vngeuarlich. Darzu han ich mit guten truwen fur mich vnd min erben gelopt vnd verheissen, den vorbenempten Arnolt Wissling, Hermann Kolomotzen vnd Annen siner elichen wirtin oder iren erben den vorgeschriben zehenden vor der lehen hand ze fertgenn vnd ze iren handen ze bringen nach lehens recht vnd daruff des selben zehenden mit aller zugehord wêr vnd^b troster ze sin an geischlichen vnd an weltlichen gerichten vnd an allen den stetten, da es ie denn notdurfftig ist oder wirt, als ferr vnd als vil, vntz daz sy daran habent sind vnd daz sy ein gewêr dabi schirmet nach lehens vnd landes gewonheit vnd recht, an ir schaden, vnd sunderlich ist her inn beredt vnd gedingot, ob der vorgenant zehend iena hafft oder ansprachig ware, daz denn ich oder min erben sy oder ir erben darumb verstan vnd versprechen sond an allen stetten vnd gerichten, da es notdurfftig wirt, vnd sollent den zehenden mit siner zugehord entrichen ledig los vnd vnansprachig machen alles in vnserm kosten an ir schaden an alle geuerde. War aber, daz ich oder min erben darinn summig wurdint vnd daz die egenanten Arnolt Wissling, Herman Kolomotz vnd Anna sin elichi wirtin oder ir erben des in dehein weg ze schaden kamind, den schaden allen soltint ich oder min erben inen gantzlich ablegen widerkeren vnd vssrichten an ir schaden vngeuarlich. Vnd des alles ze warem vrkund han ich der obgenant Herman von Landenberg min eigen insigel offenlich gehenkt an disen brief. Der geben ist an vnser lieben frowen abend in dem ogsten nach Crists geburt vierzehenhundert jar, darnach in dem einlifften jare.