Wir^a grauff Frydrich von Toggenburg¹ herr ze Tafâs² vnd ze Brettengôw³ etc. tunt kunt vnd vergechen offenlich mit disem brieff||
fur vns vnd alle vnser erben vnd nâchkomen, als vnser getruwen die Schubinger von Vtzna vnd der Kung von Smarikon||
ir leyenzehenden beid da selbs ze Smarikon gelegen, so von vns bis hier ir lehen gewesen sind, recht vnd redlich ze koffen||
geben hand den geischlichen vnsern sunder lieben in gott abbt Gotfrit vnd gemeinem conuent des gotzhus ze Ruty des ordens von Premonstrat in Costentzer bystum, als vns dis alles furbrâcht ist, das wir da nâch vffgebung der obgenanten Schubinger vnd des Kunges zu dem selben koff vnsern willen vnd gunst geben vnd ze trôst vnd heil vnsern vordern saligen, die da selbs ruwent sind, vnd ôch vnser vnd aller vnser nâchkomen selen luterlich durch got vnd nâch flissiger bette der obgenanten geyschlichen luten von Ruty fur vns vnd die vorgedachten vnser erben vnd nâchkomen die selben zehenden beid den obgeschriben abbt Gotfrit vnd conuent ze Ruty dem selben irem gotzhus vnd allen ir nâchkomen geeigent haben vnd eigen in ôch die also frylich ledklich vnd wissentlich eweklich nu furbas ze halten vnd ze niessen als ander ir eigen gut vngesummet von vns vnd allen vnsern erben vnd nâchkomen mit krafft ditz gegenwirtigen brieffes. Vnd des ze einem waren vnd staten vrkund haben wir vnser eigen insigel fur vns vnd die obgedachten vnser erben vnd nâchkomen offenlich heissenn henken an disen brieff. Der geben ist ze Vtzna in vnser vesty an vnser lieben frowen aubent ze mittem ougsten des jares, als man zalt von Crysti geburt viertzehenhundert vnd einliff jare.