Allen den, die disen brieff an sehent oder horent lesen, kunden wir Peter von Hewen frie||
ritter vnd Wolffram von Hewen² frie gebruder vnd vergehent des offenlich mit disem||
brieff, das wir von den ersamen frow Annen ze Burgtor Intall Eglins salgen||
elichu frow, Cunratten vnd Hanscunratten Eglin gebruder iro sun an barem gut enpfangen habent sechs vnd drissig pfund alles guter vnd genamer pfeningg Costentzer muntz vnd werung, vnd sagent der gantzlich von inen gewert vnd haben die in vnsern nutz geben vnd bekert, vnd dz wir den selben Eglin gebruder vnd iren erben fur vns vnd vnser erben vmb dz selb gut die sechs vnd drissig pfund pfening habent ze koffenn geben recht vnd redlich vnd ains iemer werenden ewigen koffes die drissig schiling pfening Costentzer muntz geltz vnd acht viertall habern geltes vssgandes geltes sant Galler mess alles rechtz zins vnd jar vssgandes gutz von manklichem ze richten vnd ze geben, die jarlichen gand vnd vns gegangen sind ab vnd vsser den zwain hoffen gelegen ze Mos³ bi Burglon⁴ vnd die zugehoren vnd zinsend dem gotzhus zu sant Gallen vnd die jetz inne hand vnd buwend Rudi Rudger vnd Hans Rudger gebruder, die och zugehorent dem gotzhus zu sant Gallen, die selben Rudger vnd all ir erben vnd nachkomen, wer jemer die hoff inne hett vnd buwett, den selben zins die drissig schiling pfening vnd zwen mut habern geltz den selben Eglin vnd der erben jarlichs richten antwurten vnd geben sond in allem dem rechten, alz si vns dz gebunden warend ze gebenn, vor vss vnd vor manklichen, vnd habend och inen vnd iren erben fur vns vnd vnser erben dz selb jarlich gelt vnd in allen den rechten, so wir daran gehebt habent, es sie von vogtrechtz wegen von gewaltsami vnd wz wir daran gehebt habent, also ze koffenn geben fur reht ledig aigen vnd habend vns gen den selben Eglin vnd gen iren erben fur vns vnser erben an dem selben jarlichen gelt vnd an den rechten, so wir daran gehebt haben, entzigen vnd entzihent vns daran offenlich mit disem brieff aller aigenschafft alles vogtrehten aller gewaltsami aller lehenschafft vnd alles des rechten, so wir je daran gehebt habend oder jemer daran gewinen mohten nun noch hienach mit dehainen rechten, vnd habend och jetz den Rudgern enpfolhen, dz si dz selb jarlich gelt den obgenamten Eglin nun hinanhin richten vnd nit vns, vnd habend och gelopt mit vnser truw an ains geswornen aides statt, des selben koffz der selben Eglin vnd iro erben fur vns vnd vnser erben recht wer ze sind fur recht ledig vnuerkumert vnasprachig vnd fur ledig aigen nach recht des landes ane geuard. Vnd des zem vrkunt dir ding gebent wir obgenanten von Hewen baid vnseru insigell an disen brieff. Der ist geben ze ingandem ogsten nach Cristi geburt viertzechenhundert jar vnd ainluff jar.