Gotfridus miseracione divina abbas totusque conventus monasterii sancte Marie in Ruti¹ canonicorum regularium Premonstratensis ordinis diocesis Constanciensis universis presencium inspecturis tam presentibus quam futuris noticiam subscriptorum cum salute ac sospitate in filio virginis gloriose. Cum in officiis pietatis illis obligemur ad anthydoca ulteriora, a quibus beneficia pociora noscimur percepisse, hinc est, quod nos super subscriptis habito non semel sed pluries tractatu capitulari ob rogatum et in recompensam beneficii huius occasione largiter percepti ad laudem dei omnipotentis ac honorem beatissimorum Jodoci gloriosi confessoris necnon Bartholomei apostoli in capella eorundem in domo infirmarie nostre infra septa dicti nostri monasterii sita ordinavimus et statuimus ac presentibus irrefragabiliter ordinamus et apud nos ac nostros successores universos observari volumus atque sub interminacione divini iudicii in transgressores fulminandi decernimus, quatenus omni nocte et per noctem lumen ibidem ardeat perpetuis temporibus firmiter et fideliter taliter observandi. Pro huius autem nocturni luminis subsidio statuimus et presentibus ordinamus, quatenus singulis annis de decima laycali in Smerikon² pro LXa florenis aureis a dictis Schubinger de Vtzna³ et Kung de Smerikon comparata duo modii tritici mensure Thuricensis de granario nostro custodi monasterii nostri in festo beati Martini vel circa illud tempus plenarie et sine contradicione assignentur, in eventum autem, in quem huiusmodi custos, quod absit, negliens fuerit et remissus iamdictum lumen procurandi et incendendi, ut est prelibatum, ex tunc quandocumque hoc visum fuerit, priori ac suppriori dicti nostri conventus pro tempore existentibus, quorum conscienciam in hiis oneramus, recepcio eorum duorum modiorum tritici ac procuratum pretacti nocturni luminis devolvatur ad camerarium dicti nostri monasterii. Quod si eciam negliens fuerit, tunc eadem disposicio devolvatur ad cellerarium eiusdem monasterii nostri, et sic reciprocando, si idem cellerarius remissus fuerit, quod tanto devolvatur ad custodem pro tempore existentem, et sic observetur inter officiales iamdictos semper de uno ad alium altero negliente existente. Et ut hec nostra ordinamenta inviolabilia ac firma remaneat aput nos ac universos nostros successores, presentes litteras sub sigillorum nostrorum videlicet abbatis et conventus predictorum munimine duximus roborandas, promittentes nichilominus per fides nostras pro nobis ac eisdem nostris successoribus in opposicionibus predictorum futuris temporibus numquam aliquid fore acceptandum. Datum et actum in monasterio nostro Rutinensi sepedicto vigilia beati Jacobi apostoli sub anno a nativitate domini MoCCCCoXIo indictione IIIIa. Deo gratias.