Wir^a nachgenempten Geory, Lucia, Elisabeth vnd Anna Herman Scherers salgen von Rebstain¹ vss dem Rintal elichu kind kundin vnd verLiehin offenlich an disem brief fur vns vnd vnser erben allen den, die in ansehent oder horent lesen, das wir mit guter vorbetrahtung||
mit willen vnd verhengnust Iohansen Scherers vnsers anerbornen vogtes vnd ôch von vnser redlicher not wegen ain wingartli geleLgen an dem Hardlin² in dem Rintal, der obnan stôsset an spitaler bunt von sant Gallen³, vnder sich an die strâss vnd nebent sich an dez obgenanten spitâls wingarten, der Friken Swiggers waz vnd vnser lehen gewesen ist von dem erwirdigen gotzhus ze sant Gallen, mit grunt mit grât vnd mit allen rehten vnd zugehorden aines ewigen staten kôffes redlich vnd reht verkôffet vnd ze koffent geben habin den ersamen wisen Lienharten Paijer, Vlrichen Furer vnd Rudolffen Vorster von Gossôw⁴ ze disen ziten pfleger des vorgedahten spitâls ze sant Gallen vnd iren nachkomen, ob si enwarint, zu des selben spitâls handen vmb vier pfunt guter Costentzer pfenning, dero wir gantzlich von inen vsgeriht vnd bezalt worden sijen vnd die an vnsern offenn nutzz komen sint vnd bewendet. Wir habin inen och den vorgeschriben wingarten mit aller zugehorde vfgeben geuertgot vnd zu des selben spitâls handen braht, wie reht sitt vnd gewonlich ist vnd als es kraft vnd maht sol vnd mag han ietz vnd hienach. Vnd habin vns allu vieru mit des obgenanten Iohansen Scherers vnsers vogtes willen verzigen vnd verzihin vns in kraft dis offenn briefs fur vns vnd vnser erben frilich vnd wilklich reht vnd redlich des obgeschriben wingarten mit allen sinen rehten vnd mit aller zugehorde aller aigenschaft aller lehenschaft aller kuntschaft aller zugnust vnd gewer lut vnd brief alles rehten gaistlichs vnd weltlichs gerihtes aller vordrung vnd ansprachen aller reht vnd rehtung, so wir ald vnser erben an dem zu dem vnd von des vorgeschriben wingarten wegen noch zu kainer siner zugehorde vntz her vff disen huttigen tag, als dirre brief ist geben, ie gehebt habin ald noch hinnenhin in kunftigen ziten iemer gehaben oder gewinnen mohtin, vnd das wir noch vnser erben noch nieman von vnser wegen noch an vnser statt die obgenanten pfleger noch ir nachkomen noch des selben spitâls lut noch gut darvmb niemer me sollen noch wellen ansprechen vftriben bekumberren bekrenken noch in kain wis beswarren weder mit gaistlichem noch weltlichem geriht noch ân reht noch mit dehainen andren sachen ân alle geuerde. Wir habin ôch gelôpt vnd lobin mit disem brief fur vns vnd vnser erben, des vorgeschriben wingarten mit aller zugehorde vnd des kôffes reht weren ze sine nach landes reht vnd si darvmb ân iren schaden ze versprechent vnd ze verstand gen allermenglichem, als dik si darvmb angesprochen vnd vfgetriben werdent mit dem rehten, ân geuerde. Vnd ze offemm wârem vrkund dirre vorgeschriben dinge vnd vergicht so habin wir allu vieru vnd mit vns vnd von vnser wegen der wolbeschaiden Haini Stamler, dem der obgenant Iohans Scherer vnser vogt die vogty beuolhen vnd vfgeben hât, erbetten, won wir nit aigner insigel habin, den wisen Iohansen Oler keller ze Balgach⁵, das er sin insigel im selb vnd sinen erben ân schaden fur vns vnd vnser erben an disen brief gehenkt hat. Der geben ward ze Rebstain an vnser frôwen abent ze der liehtmisse in dem jare, do man zalt von Cristus geburt vierzehenhundert, darnach in dem nunden jare.