Ich^a graf Fridrich von Toggenburg bekenn mit dem brief fur mich vnd min erben, das ich mich der scheden, so ich oder die minen von minen wegen||
genomen haben, es sy mit laistung mit zerung mit bottenlon ritend oder gend von wegen der vier tusent guldin vnd der drutzehendhalb hundert||
guldin zins dauon, vnd auch der scheden, die ich minem lieben pruder graf Hugen von Montfort herren ze Pregentz schuldig gewesen bin nach||
lut sinr brief, die er darumb inn hat, gentzlich begeben vnd verzigen hab, also das ich minem gnedigen herren hertzog Fridrichen ze Osterrich sinen prudern noch ir aller erben darumb numermer zugesprechen sol noch wil in dehain wis noch weg ân all geuerd, doch nemlich vssgenomen vnd mir vnd minen erben vorbehebt die scheden vnd laistung, die die angulten vnd burgen genomen haben vnd getan von minen vnd der obgenanten schuld zins vnd scheden wegen, die sol der vorgenant min gnediger herr hertzog Fridrich ze Osterrich sin pruder ir erben vnd nachkomen abtragen vnd mich dauon vnd min erben entnemen nach lut vnd sag der brief, die ich darumb von miner gnedigen herschaft ze Osterrich etc. inn hab. Vnd des ze vrchunt hab ich min insigel gehangen an den brief. Der geben ist ze Veltkilch an der nechsten mittichen nach sant Angnesen tag nach Cristi geburt viertzehenhundert jare vnd in dem nunden jare.