Ich^a graf Fridrich von Toggenburg¹ bekenn vnd vergich mit dem brief fur mich vnd min erben von des briefs wegen,||
den ich inn hab von dem hochgeboren fursten minem gnedigen lieben herren hertzog Fridrichen ze Osterrich² etc., der da||
lut vnd sait, das er mich abtragen sol vnd entnemen von dem wolgeboren minem lieben pruder graf Hugen von MontLfort herren ze Pregentz³ vmb vier tusent guldin hobtguts vnd vmb drutzehendhalbhundert guldin zins, die daruff geloffen sind, vnd auch vmb den schaden, den der obgenant min lieber pruder graf Hug dauon genomen hat. Bekenn ich vorgenanter graf Fridrich von Toggenburg, das mich der obgenant min gneediger herr hertzog Fridrich ze Osterrich etc. vmb die vorgenanten vier tusent guldin hobtguts vnd auch vmb drutzehendhalbhundert guldin zins dauon vnd auch vmb den schaden, den der obgenant min lieber bruder graf Hug von Montfort genomen hat, gentzlich abgetragen vnd entnomen hat gen dem vorgenanten minem pruder graf Hugen, vnd sag auch also den vorgenanten minen gnedigen herren hertzog Fridrichen ze Osterrich sin pruder vnd ir aller erben darumb gentzlich quit ledig vnd los mit dem brief. Vnd des ze vrchunt hab ich min insigel gehangen an den brief vnd hab auch darzu flissklich gebetten den erbern minen lieben diener Hansen Ort, das der sin insigel zu ainr gezugnusz aller vorgeschriben ding zu dem minen an den brief gehangen hat, doch im vnd sinen erben an schaden. Der brief ist geben ze Veltkilch⁴ an der nechsten mittichen nach sant Angnesen tag nach Cristi geburt viertzehenhundert jar vnd darnach in dem nunden jare.