Wir^a Cuno von gots gnâden abt des gotzhuses ze sant Gallen¹ sant Benedicten ordens, das ân alles mittel zugehort dem stul ze Rôm, in Costenzer bistum||
gelegen tun kund allermenglichem mit disem brief, das fur vns kam der wolbeschaiden Herman von Rêhberg² vnd offnet vor vns, Walti Himelberger hetti||
ain gut genamt Zwiselen³ in Herisower⁴ parrochi, usser demselben gut gieng jarlich ain pfund pfenning Costenzer munsse zinses, vnd^b desselben zinses geburtin||
zehen schilling pfenning im vnd Hansen vnd Elsen von Rêhberg sinen êlichen kinden vnd iren erben, ob si enwerint, vnd zehen schilling pfenning desselben zinses Elsen ab Bul Rudis saligen ab Bul elicher tohter vnd ir erben, ob si enwer. Nu hetti ehafti nôt in vnd sini vorgenanten kind darzu gedrungen, das si iro zehen schilling des ietzgenanten zinses musstin angriffen vnd verkoffen, vnd darumb so warint si gangen zu Waltin Himelberger vnd hettin dem die iro zehen schilling angebotten, ob er die koffen wolt, wolt aber er die niht kôffen, so woltin si die ze kôffen geben der ersamen fro Ffrenen Krumbinen Hainrichs Krumben des eltern burgers ze sant Gallen elicher wirtinen, dar uf hett inen derselb Walti Himelberger geantwurt, er logenti nit, der egenant zins gieng usser sinem vorgenanten gut, als vor ist erzalt, er wolti aber die zehen schilling, als es ietz geschaffen war, nit abkôffen, vnd mohtin die geben, wemm si woltint. Des alles ist och der selb Walti Himelberger vergihtig gewesen, vnd hervmb so hand die egenanten Herman von Rêhberg vnd Hans vnd Els von Rehberg sini elichi kind iro zehen schilling pfenning jarlichs zinses ab vnd vsser dem gut Zwisellen da vorgenant fur sich vnd fur alle iro erben aines staten ewigen kôffes ze koffenn gegeben der vorgenanten fro Ffrênen Krumbinen vnd irn erben, ob si enwar, vmb siben pfund pfenning guter Costenzer munsse, vnd sind och desselben geltes bezalt vnd hand das bewendet an iro offen nutzz vnd hat vns der egenant Herman von Rêhberg mit sin selbes handen vnd hand vns och die egenanten sini elichi kind Hans vnd Els von Rêhberg och mit iro selbs vnd mit des ietzgenanten Herman von Rêhberg iro elichs vatters vnd rehten vogtes handen die egenanten iro zehen schilling pfenning jarlichs zinses usser Zwisellen da vorgenant ufgeben an vnser hand vnd hand vns gebetten, das wir die lihin ze lehen der egenanten fro Ffrenen Krumbinen, darumb haben wir iro bett erhort vnd haben derselben fro Ffrenen Krumbinen die ietzgenanten zehen schilling pfenning jarlichs zinses gelihen ze lehen vnd lihen ir och mit disem brief, was wir ir durch reht dar an lihen sond, doch vns vnd vnsern nachkomen vnd dem egenanten vnserm gotzhus ze sant Gallen an allen vnsern ehafftinen nutzen rehten vnd gewonhaiten vnschadlich. Die vorgenanten Herman, Hans vnd Els von Rêhberg sprâchen och vor vns, die egenanten zehen schilling pfenning zinses vielint vnd soltin och gerihtet vnd gegeben werden nach sogtaner zins reht allerjarlich ie uff sant Martins tag, welhes jares aber das nit beschah, so mohtin die egenant fro Ffrên Krumbin ir erben vnd nachkomen ie nach sant Martins tag, wenne si woltint, selber oder durch iro botten vnd helffer vmb denselben zins vnd vmb den schaden, in den si da von koment, den egenanten Waltin Himelberger sin erben vnd nachkomen vmb den zins vnd schaden uftriben vnd das gut genamt Zwisellen mit sinen zugehorden angriffen nach sogtaner zins reht vnd gewonhait. Die egenanten Herman, Hans vnd Els vnd Rehberg hand sich och iro vorgenanten zehen schilling pfening zinses verzigen, als reht ist, vor vns vnd verzihent sich dero mit disem brief nv vnd hernach ewklich fur sich vnd iro erben. Dieselben Herman, Hans vnd Els von Rehberg hand och vnuerschaidenlich gelobt mit iro truwen fur sich vnd iro erben, dero egeseiten zehen schilling pfenning zinses usser Zwisellen vnd diss koffs mit iro zugehorden weren ze sinne nach landes reht vnd die egenant fro Ffrenen Krumbinen vnd ir erben, ob si enist, darumb ze versprechenn ân iro schaden, wenn gen wemm vnd wiedik si des bedurffent, zum rehten âne geuerd inwendig dem zil, als diser brief bindet, wer ze sinne, vnd ze vrkund der wârhait haben wir obgenanter abt Cuno disen brief von der lehenschafft wegen versigelt mit vnserm aptlichen anhangenden insigel. Wir egenanten Herman, Hans vnd Els von Rehberg veriehen ain gantz wârhait alles des, so von vns geschriben stât an disem brief, den der beschaiden Hans der Sailer burger ze sant Gallen heruber von vnser bett wegen im selb vnd sinen erben vnschadlich fur vns vnd vnser erben versigelt mit sinem aignen hangenden insigel. Geben ze sant Gallen uff der pfallentz am nahsten samstag nach sant Vallentinus tag, do man zalt von Cristi geburt vierzehenhundert jar, darnach in dem nunden jar.