Wir^a Fridreich von gots gnaden hertzog ze Osterreich ze Steyr ze Kernden vnd ze Krain graf||
ze Tyrol etc. tun kunt, als wir dem edeln vnserm lieben oheim graf Fridrichen von Tokhemburg||
tausent guldin schuldig worden sein von der scheden wegen, so er genomen hat von wegen der dreyer tusent||
guldin, die vnser bruder hertzog Leupolt vnd wir im schuldig waren, darumb er vnsern brief het, vnd aber wir yetzen mit im ainer tayding vberkomen sein, daz wir im dieselben tausent guldin auf seinen satz zu Sangans slahen sullen, als das denn in den taydingbriefen, der vnser yetwedrer tail ainen hat, aigenlich ist begriffen, also haben wir dem egenanten von Tokhemburg dieselben tausent guldin geslagen auf seinen satz zu Sangans vnd slahen auch wissentlich mit dem brief, in solcher mass, daz er vnd sein erben die darauf haben vnd niessen an abslag der nutz in aller der mass, als ander gelt darumb in die herrschaft zu Sangans vormals ist versetzet worden, an geuerd. Mit vrkund ditz briefs. Geben ze Fryburg im Bryssgow an mantag vor sand Lucien tag nach Christs gepurd in dem viertzehenhundertisten vnd dem achten jare.