Wir^a nâchgenamten Lienhart Paiger, Rudolff Vorster von Gossow vnd Walther Vogler von Altstetten burger ze sant Gallen pfleger vnd maister||
ze disen zyten der armen siechen des hailgen gaists spittale ze sant Gallen in der statt tun kund kund vnd ze wissenn offenlich mit disem brief allen||
ietzigen vnd kunfftigen, die in sehent oder horent lesen, won dis gegenwurtig zytlich leben vnd mentschlich geschlaht zerganklich ist vnd ieklichem||
mentschen gedanket wirdt nach sinen guten werken, hervmb hât die erber wolbeschaiden fro Adelhait Eggin burgerin ze sant Gallen Vlrichs Eggis saligen wilunt elichi wirtinn gar mit guter vorbetrahtung vnd nach vnderwisung irs bihters vnd andrer lute gelerter vnd vngelerter vnd durch ir vnd des egedahten irs mannes saligen vnd durch iro vordren vnd nachkomenn selen hailes willen gegeben hât sibenzig pfund pfenning Costentzer munsse an barschaft vnd ir hus hofstatt vnd hofraiti gelegen ze sant Gallen im Brul an der ringmur entzwuschen Schlaipfers vnd Stokmans husern fur vierzig pfund pfenning der egenanten munsse vnd git och das gelte vnd huse da vorgeseit reht vnd redlich fur sich vnd all ir erben an den obgenamten spitale, vnd hât das alles angesehen gehandelt vnd getân mit sogtanen vorworten vnd bedingden, als hie nachgeschriben stât an disem brief, das ist also. Wir obgenamten pfleger vnd maister des vorgeschribnen spitales vnd alle vnser nachkomen vnd furwesen desselben spitales usser vnd inner, wer die sind ald werdent nv ald hernach, sollen bi guten truwen vnd als wir got darvmb antwurten wellen vnd sollen von dero egenamten hundert vnd zehen pfund pfenningen wegen, die sy an den spitale gegâbet hât, uff dis gegenwurtig jâr anheben vnd sond dannenhin allerjarlich vnd iemerewklich ie uff den ersten mantag im brâchet ainen capplan desselben spitâls, welher ie danne da ist, haissen verkunden vnd begân des egedâhten Vlrichs Eggis irs manss saligen jârzit mit ainer gesprochnen selmess, vnd sol och ain capplan desselben spitals des ietzgedahten Eggis saligen alle sunnentag iemerewklich gedenken an der cancell desselben spitals, vnd sond im die maister vnd furwesen des ietzgeschribnen spitales darumb jarklich uff desselben irs mannes jarzitlichen tag geben ainen schilling pfenning vnd sond och jarklich uff desselben irs mannes jârzitlichen tag allen vnd ieklichen siechen vnd kinden des obgenamten spitales, wieuil dero iedanne ist, geben ainen imbiss vnd ain nahtmâl ietweders von gutem flaisch vnd wîssem brot vnd von andrem gekocht, als man erberi mâl gibet vngeforlich, vnd och mit namen ieklichem deroselbe siechen ze imbis ain mâss vnd ze nahtmal ain mass guts vngeforlichs wines sant Galler messes uff den selben tag, vnd sond och darzu aber uff denselben tag ieklichem siechen vnd ieklichem kinde desselben spitales geben ainen pfenning vnd sond iro ieklichs, es sig siech oder kind, da mit lassen kôffen, was es wil, alles zu ainer angedenknuss gotes vnd aller globiger selen. Vnd wenn got uber die vorgenamten Adelhaiten Egginen gebutet vnd si uss diser zyt geschaiden ist, das got lang wend, so sol ir jârzitlicher tag gelait werden uff den ersten ffritag im brâchet, vnd sol ir jârzit dannenhin jarklich uff denselben tag begangen vnd ir sele gedâht werden, vnd sol och dem capplan den siechen vnd kinden des vorgenanten spitales jarklich uff denselben ir jârzitlichen tag gegeben vnd getân werden ze gelicher wîs vnd in aller der mâsse, als da vor von irs mannes jârzitlichen tag vnd sachen gelutert ist an disem brief, danne das man uff derselben Adelhaiten Egginen jârzit, won es uff ffrîtag gelait ist, ze imbiss vnd ze naht visch sond gegeben werden fur flaisch. Och hât dieselb Adelhait Eggin angesehen vnd ist bedinget vnd beredt got ze lob vnd allen selen ze trost, das man uff den nahsten kunfftigen donstag nach datum diss briefs anheben sol vnd dannenhin iemer ewklich alle wuchen an ieklichem donstag vnd an ieklichem sunnentag den siechen vnd betligern in dem selben spitale, wieuil dero ie dann ist, ainest betten sol erberklich vnd getrulich âne geuerd, vnd die mâle zu des egedâhten Vlrichs Eggis saligen vnd och zu der obgenamten fro Adelhaiten Egginen jârziten vnd zu ietwederm jârzite ainem capplan des obgenamten spitales ain schilling vnd ieklichem siechen vnd kinde ain pfenning ze ietwedrem jârzit vnd och das vorgeseit betten an ieklichem donstag vnd an ieklichem sunnentag ainest sol alles gegeben vsgerihtet vnd beschehen werden, vnd sol och ietweders jârzit mit ainer gesprochnen selmess begangen vnd des egeseiten Vlrichs Eggis sele vnd der obgenamten fro Adelhaiten Egginen sele gedâht werden, als dis alles da vor an disem brief beschaiden vnd gelutert ist. Vnd sond die maister vnd furwesen des egenamten spitales usser vnd inner, welh ie danne sind, schiken vnd schaffen, das das alles von desselben spitales kisten kasten vnd kelre getân gegeben vnd usgeriht werdi iemerewklich ân allen abgang, won das alles wir vorgenamten ietzigen pfleger vnd maister des obgenamten spitales durch besser vnd nutzzer frome willen, so wir dem egenamten spitale mit dem obgenamten gelt vnd huse geworben hand, also gelobt vnd vfgenomen haben bi guten truwen in namen vnd an statt desselben spitals fur vns vnd vnser nachkomen, als wir alle got darumb antwurten wellen vnd sollent, vnd won aber dis alles also, als da vor ist erzalt, gehalten sol werden, so ist mit namen bedinget, das diser gegenwurtig brief ze behalt vnd ze getruwer hand den siechen vnd kinden da vorgeseit gelait vnd befolhen sol werden hinder den rât der statte ze sant Gallen, von des haissens vnd gebottes wegen wir pfleger sind. Ob dem capplan den siechen vnd kinden da vorgedaht an disen dingen infall beschahint ald abzug, das si darumb zufluht nemint zu dem râte vnd danne ain rât oder besorger ze sant Gallen den egenamten spitale darumb bessri nach siner erkantnuss vnd beschaidenhait âne geuerd, als dik das ze schulden kom. Heruber ze stater ewiger sicherhait haben wir obgenamter Lienhart Paiger, Rudolff Vorster vnd Walther Vogler vnsri aigni insigel vns vnd vnsern erben vnschadlich gehenkt an disen brief vnd och des obgenamten spitales insigel fur vns vnd alle vnser nachkomen maister pfleger vnd furwesen des obgenamten spitales, wer die sind ald werdent nv ald hernach. Dirre brief ist geben ze sant Gallen am nahsten donstag nach sant Jacobs tag im howet im jâre, do man zalt von Crists geburt vierzehenhundert jar vnd darnach in dem ahtenden jare.