Wir^a Ruprecht von gots gnaden Romischer kunig zu allen czijten merer des richs bekennen vnd tun kund offinbar mit diesem briefe||
allen den, die yn sehent oder horent lesen, das fur vns komen ist vnser lieber getruwer Caspar von Clingenberg³ vnd bate vns mit||
flisze, das wir yme den hoffe zu Huttisweile⁴ lute vnd gute mit allen zugehorungen vnd aller manschaffte, die von vns vnd dem||
riche zu lehen rureten vnd von todes wegen Albrechts von Burglin⁵ seligen, der die zunebst innegehabt hette, verfallen weren, zu verlihen gnedeclich geruchten. Des haben wir angesehen desselben Caspars von Clingenberg fliszige vnd redeliche bete vnd auch solich dinste vnd truwe, als er vns vnd dem riche getan hat vnd furbaz in kunftigen zijten dun sal vnd mag, vnd haben yme den obgenanten hoff mit sinen zugehorungen vnd manschafften, als vorgeschrieben stet, von besundern vnsern gnaden vor ein verfallen lehen verluhen vnd gereicht, verlihen vnd reichen im daz auch in craft disz briefes vnd Romischer kuniglicher mechte, die in allen rechten vnd nutzen innezuhaben vnd vns vnd dem riche dauon mit guten vnd rechten truwen zu dienen zu gewarten vnd verbunden zu sin in aller der masz, als der egenant Albrecht von Burglin die rechte vnd redeliche innegehabt herbracht vnd besessen hat vnd als solicher lehen recht vnd gewonheit ist, waz wir yme von rechte daran lihen sollen vnd mogen, vnschelich^b doch yederman an sinen rechten. Vnd der obgenant Caspar hat vns auch daruber huldunge getan mit gelubden vnd eiden, als gewonlich ist vns als einem Romischen kunige vnd dem riche dauon zu tunde. Orkund disz briefes versigelt mit vnser kuniglichen maiestad anhangendem ingesigel. Geben zu Heidelberg⁶ nach Cristi geburte vierczehenhundert vnd darnach in dem achten jare vff den dinstag vor sannd Bartholomes des heiligen zwolfbodten tag, vnsers richs in dem achten jare.