Dem edeln erwirdigen Cun abt ze sant Gallen¹ vnserm gnadigen herren enbieten wir Peter von Hewen frye vnd ritter vnd Wolfran||
von Hewen² sin bruder vnser willig gehorsam dienst in allen sachen vor. Gnadiger herr, wir tunt vweren gnaden ze wissen, als der zehend||
ze dem Willa³ mit aller zugehord von vch vnd vwerem gotzhus vnser pfand ist, dz wir den selben zehenden vnd elli die recht,||
die wir dar an hant, fur vns vnd alle vnser erben recht vnd redlich verkoft vnd ze koffen geben hant Rudolf Wingarter⁴, Elsbeten siner elichen frowen wilent Clas Turmans elichem wib, burgere ze Liechtistaig⁵ vnsers vetters graf Fridrichz von Toggenburg⁶ amman vnd allen iren erben vmb hundert guldin, sibentzig guldin vnd sechs guldin gut vnd swar an gold vnd an gewicht, die er vns dar vmb geben vnd gewert hat an den stetten, da wir vnsern grossen schaden mit gewendet vnd verkomen haben. Her vmb so bitten wir vwer gnad mit allem ernst, das ir inen des koffes vnd pfandes gunnen wellent in aller der wis vnd mass als vns vnd su dar vmb versorgent mit vweren briefen, dar an su ain benugen haben. Das wellent wir alle zit vmb vwer gnad beschulden. Vnd des ze warhait so han ich Peter von Hewen min insigel offenlich gehenket an disen brief, vnder das selb insigel ich obgenanter Wolfran von Hewen mich verbunden han gebrestenhalb des minen fur vns vnd alle vnser erben. Der geben ist ze Schwartzenbach⁷ an dem nachsten mandag vor vnser lieben frowen abent ze der liechtmiss nach Cristz geburt vierzehenhundert jar vnd dar nach in dem sechsten jar.