Ich Haydenreich von Toehenstain und ich Offenei sin housvrowe und ich Werenhart von Weydervelde und ich Margret sin housvrowe und ich Hainrich von Weydervelde sin pruder und ich Alber hern Hain-riches sun von Paden und ich Margret sin housvrowe und ich Dietrich von Manswerde und ich Anne sin housvrowe und wir Hainrich und Katerei des Lonholtz chint wir veriehen und tun chunt allen den die disen prief lesent oder horent lesen die nu lebent und hernach chunftich sint. Daz wir mit guetem willen und gunst aller unser erben und mit gesampter zu der zeit do wir es wol getun mohten und mit unser Perchherren hant hern Marchardes von Mistelbach hern Ruedolffes von Eberstorf zu den zeiten Oberister Chameraer in Osterrich hern Greiffen pi unser vrowen uf der Stetten ze Wienne Symons des Pellendorfaer zu den zeiten amptman des gotes houses unser vrowen ze Neunburch, verchouft haben unsern weingarten der da leit an dem Nusperge zenaehest hern Chunrades weingarten des Nustorffaer des ein Jeuch ist und der uns an erstorben ist von unser mueter vron Margreten der Weyderveldaerinne der got genade. den selben weingarten haben wir gegeben mit allen dem nutz und reht als wir in und uns vodern her praht haben in perchrehtes gewere umb funf hundert pfunt wiennaer pfenninge der wir reht und redlichen gewert sin. den erwaeren chinden Niclas Ruegern und Hainrichen hern Ruegers suen von der Schaewentz, dem got genade, fuerbaz ledichlichen und vreilichen ze haben und allen iren frumen da mit ze schaffen verchouffen versetzen und geben swem seu wellen an allen irresal. Und zu einer pezzern sicherheit so setzen wir uns unver-scheidenlichen uber den vorgenanten weingarten ich egenanten Haydenreich von Toehenstain und ich Offenei sin housvrowe und ich Wernhart von Weydervelde und ich Margret sin housvrowe und ich Hainrich sin pruder und ich Alber hern Hainriches sun von Paden uns ich Margret sin housvrowe und ich Dietrich von Manswerde und ich Anne sin housvrowe den egenanten Niclas Ruegern und Hainrichen fuer uns und fuer alle unser erben und fuer die vorgenanten unser swester chint Hainrichen und Katerin des Lonholtz chint, die noch zu iren jaren niht chomen sint noch fogpaer sint, ze rehte geweren und scherme, fuer alle ansprache als perchrehtes reht ist und des landes reht in Osterrich. und verpinden uns des mit unsern trewen. swaz deu vorgenanten chint Hainrichen und Katerin an gevellet zu irem tail der egenanten phenninge do der vorgenant weingart umbe verchouft ist, daz wir in umb daz selbe guet sullen chouffen ein erbe guet nach der vorgenanten leute gewizzen die disen weingarten wider uns gechouft habent und sol ouch daz selbe erbe guet daz umb die selbe phenninge gechouft wirt der vorgenanten chinde Niclas Ruegers und Hainriches rehteu ebenteur sin zu sampt unserm schermen also lange untz daz die egenanten chint Hainrich und Katerei fogpaer werent und wol zu iren jaren chomen sint, als perchrehtes reht und des landes reht in Osterrich. Und daz diser chouf und diseu rede fuerbaz steet si und untzebrochen beleibe dar uber so geben wir in disen prief ze einem sihtigen urchunde und zu einem waren gezeuge diser sache versigelten mit unsern Insigeln. und mit hern Chonrades Insigel des Nustorffaer der des vorgenanten weingarten choufman gewesen ist und ouch diser sache warer gezeuch ist mit sinem Insigel. Diser prief ist geben ze Wienne nach Christes geburtte dreutzehen hundert jar dar nach in dem sibentzehenden jar viertzehen tage vor Ostern.

Source Fulltext: Peter Peusquens