Wir Nichlas von Gotes gnaden Abt und die Samenunge gemain des Goteshausse unserr vrowen sant Marien der Schotten ze Wienne veriehen an disem priefe und tuen chunt allen den di in lesent horent oder sehent, daz der Erber Ritter her Chunrat der junge huebmaister Einen altar gestiftet hat an Hertzog Heinriches grab in unserm Goteshause, und den hat er gewidemt mit vier phunden geltes, di wir von im in nutz und in gewer haben, also daz wir auf dem selben altar alle tage ein messe haben suln von einem unserr Prueder seiner sel und vron Breiden / Greiden (Geysel s. u.) sel seiner housfrowen, und aller irer vordern sel, ze hail und ze trost. Ob daz awer waer, daz wir daz niht steet behielten, also daz wir di messe alle tag niht enhieten, als da vor geschriben ist, so solt der vorgenant her Chunrat der junge huebmaister oder sein housfrowe vron Greide, ob er niht enist, oder ir naehste geerben ob si baide niht ensint sich der gulte underwinden mit unserm guetlichen willen, und geben auf ein ander Goteshaus swa in lieb ist. Und dar umbe daz daz also staet und unzerbrochen beleibe, des geb von dar uber disen prief versigelten mit unsern Insigeln. Diser prief ist gegeben, nach Christes gepurt dreuzehen hundert jar und dar nach in dem sechzehenden jare an sant Othmares tage.

Source Fulltext: Peter Peusquens