Ich Symon von Paelndorf vergich und tun chunt allen den die disen prief lesent oder horent lesen, die nu lebent und her nach chunftig sint, daz die erber vrowe vrou Irngard hern Weybotes wittibe dem Got gnade fur mich chomen ist und hat mit gutem willen und mit verdachtem mute zu der zeit do sie iz wol getun mochte, und mit meiner hant, recht und redlichen gemachet und auf gegeben den vroun von sand Claren iru weingarten des ain halbes Jeuch ist und leit ze Nuzdorf pei dem Gaizzrukke ze naehst der Taeutschen herren alten urvar, also daz sie ir sele und ir vodern sele ewichlichen da von gedenchen suln, und han auch ich den selben vroun von sand Claren den vorgenanten weingarten verlihen ze rechtem perchrechte nach des landes recht ze Ostereich, damit furbaz allen irn frumen ze schaffen, verchaufen versetzen und geben swem sie wellent an allen irresal, und wand dise sache vor mir und mit meiner hant recht und redlichen geschehen ist da von so gib ich den vroun von sand Claren disen prief zu ainem sichtigen urchunde und zu ainem offen gezeuge und zu ainer ewigen vestnunge diser sache versigilten mit meinem Insigil. Diser sache sint gezeug her Eberhart der Techent von Newenburch, her Toman der Chelner von Newenburch, her Weichart pei den Minnern Prudern, Fridreich der Huetstok, Engeldiech von Maurbach, Fridreich hinter dem dorfe, Fridreich von Chritzendorf, und ander frume leute genug den dise sache wol chunt ist. Diser prief ist geben ze Wienne do von Christes geburt waren ergangen dreutzehen hundert jar in dem sechzehenten jare dar nach an sand Merteins tage.

Source Fulltext: Peter Peusquens