Ich Ditrich von Pilichdorf, haubtman in Osterrich, vergich und tuen chunt allen den di den brief lessent oder horent lesen. Daz her Fridrich van Walse veriehen hat vor den Landherren ze Osterrich, daz er dehain recht an dem guet und an der Chirchen ze Weigleinstorf hat, daz dem Purger Spital an gehoert zei Wienn und hat sich des lauterleich geauzzent und verzigen, und dar uber gib ich den brief dem vorgenanten Spital ze einem urchund, versigelten mit meinem Insigel. und sint da bei gewesen. her Eb(er)(hard) van Walse. Her Alber van Chunring. her Otte van Zelking. her Haidenrich purcrave ze Gars. her Marchart van Mistelbach. her Hadmar der Stuchs van Trautmanstorf. und her Ulrich van Maissawe. und ander piderbe laeut genueg. Der brief ist gegeben ze Wienn nach Christes geburd Dreutzehen Hundert Jar, dar nach in dem Sechtzehentem Jar. des samztages vor Bartholomes tag.

Source Fulltext: Peter Peusquens