Ich Nycols der Preussel. und ich Diemut sein hausfrowe. wir veriehen und tun chunt allen den die disen brief lesent oder horent lesen. die nu lebent. und her nach chunftich sint das wir mit unser erben guetem willen unde gunst. mit verdahtem muet. und mit gesamter hant zu der zeit do wir is wol getun mochten. verchauft haben unsers rehten aigens vierzehen schillinge wienner phennige geltes. di da ligent. auf weingarten in dem haidhove bei sant Lazarus. und der man dient alle iar siben schillinge an sant Joerigen tage. und siben schillinge an sant Michels tage. di vorgenanten gulte haben wir geben mit allem dem nutz und reht als wir si in aigens gewer her praht haben umb sehzehen pfunt wienner phennig. der wir reht und redleichen gewert sein den erbern Swestern Swester Christeinn. die zu den zaiten Aptessinne was. und der samnunge gemaine des Gotshaus sant Nyclos ze Wienne. und allen irn nachomen ledichleichen und vreileichen ze haben tund allen irn frumen da mit ze schaffen verchaufen. versetzzen und geben swem si wellen an allen irresal. Und dar uber zu ainer pezzern sicherhait. so setzzen wir uns. ich Nyclos der Preussel und ich Diemunt sein hausvrowe unverschaidenleichen den vorgenanten Swestern Swester Christeinn die zu den zeiten Aptessinne was. und samnunge gemaine des Gotzhaus sant Nyclos ze Wienne und allen irn nachomen uber die vorgenanten gulte ze rehtem scherm fur alle ansprache als aigens reht ist und des Landes reht se Osterreich. Und swas den vorgenanten Swestern und dem Gotzhaus sant Nyclos ze Wienne mit rehte an der vorgenanten gulte abget das sullen si haben auf uns und auf unsern triwen und auf unserm gut das wir haben in dem Lant ze Osterreich. Und geben in dar uber disen prief zu ainem sihtigen urchunde zu ainem waren gezeug und zu ainer ewigen vestnunge dieser sache versigilten mit unserm Insigel. Und sint auch des gezeug her Greiff pei unser vrowen auf der stetten ze Wienne. her Greiff sein sun. her Nyclos der Polle zu den zeiten purger maister ze Wienne. her Hainreich der Chronnest ze den zeiten rihter ze Wienne. her Nyclos von Eslaern, her Herman der Ruedolfinne sun von sant Poelten. her Andre an dem Chyemarte. her Chunrat der hansgrove. und ander frum Leute genuech den dise sache wol chunt ist. Diser prief ist geben ze Wienne do von Christes geburt waren ergangen. Dreuzehen Hundert Jar in dem Funfzehentem Jare dar nach an sant Elzbeten tag.

Source Fulltext: Peter Peusquens