Achparen und wolwirdigen besundergunstige herren liphaber und fordrer Ewer allerwolfart und gesunthêit yst uns zuvorausser von euch lieb zu hoeren Und senden euch hye ynnen vorslossne abschrifft dy uns her Orsag Mihal geschriben hat mitsampt dem Burkgraven yn dem Wynkel, dy ewer Ersamkeit lesênde wol versten wert wil da oben yemandes von kauffleuten tzeyhen tzu dem jarmarkt, der yetzunder yst auff Sant Lorentzen tag zu Prespurk, der mag seynen nutz und frumen darynne betrachten. Auch so pegert herr Orsag Myhal und Pangratz an uns, das wir uns gegen unserm allergnadigisten herren dem Romischen kunige, und gegen dem hawse ze ostereych solten arbeyten und auch gegen ewr liebe umb ein fryde auff ettlich Jar zum Ersten, darnach umb einen ewigen, und haben uns groeslichen und ser gepeten, auß solichen sachen zureden etc. Nue haben wir ein solichs zewissen getan, unsers herren des kunigs gnade. Ader unser Rathe yst nicht dapey wir thun als ain gepetner, ader vorwar sol wissen ewer alle liebe, das dy egenanten peyde vast gute lewthe pey In haben dy wir denn kennen und uns gedienet haben, und hetten sy unserr nicht geforchtet. Als wir denn nach alhye ze Prespurk ligen Sy hetten sich anzweyfel vorsucht an dy Land zu Osterreych und haben darumb unseren Czug, desterlenger allhie vorweylet, und yo pey euch, genesen und sterken, und alle unser tag thuen wellen zuwolgefallen ewer aller liebe, und herlicher guete, und das nicht anders Dye sol der herre enthalde ze seligem langen leben. Geben ze Prespurk am Sambstag vor Laurenti, Anno domini Millesimo quadringentesimo quadragesimo quinto. Johan Giskrae von Brandiss Kunig Laslaen In Hungern etc. oebrister hauptman.

Source Fulltext: Peter Peusquens