Fridreich von gots gnaden Roemischer Kunig zu allenzeiten Merêr des Reichs, Hertzog ze Osterreich ze Steir etc. Erbern weisen und lieben getrewen. Wir lassen ew wissen, daz wir ainen fuerslag fuer den Harrenstain zemachen und den zu unsern hannden zepringen mainen, nachdem und uns lannden und leutten groß und mercklich scheden, von dem selben Gesloss zu getzogen sein. Davon so Begern und pitten wir ew mit ganntzem fleiß und ernst, daz Ir mit den ewern so Ir uns zu Rossen und ze fuezzen zu dienst zugeschikcht habt schaffen und In emphelhen wellet, sich mitsambt andern den unsern fuer dasselb Gesloß zeslahen, das helffen zearbaiten, und zu unsern hannden zepringen, damit solh obberurt verhanndlung gestrafft und wir Ir lannd und leutt kuenfftigs schadens davon vertragn werden. Daran tut Ir uns ain sunder dancknem wolgevallen, und wir wellen das auch gen ew gnêdiklich erkennen. Geben im veld bey Brodestorff an Sannd Stephans tag,anno etc. quadragesimo quinto Unsers Reichs im sechsten jare. Commissio domini Regis in cons(ilio).

Source Fulltext: Peter Peusquens