Albrecht von gotes gnaden Romischer Kunig zu allen zeiten Merer des Reichs ze Hungern Dalmacien und Croacien etc kunig Erwelter kunig ze Behem Hertzog ze Osterreich und Markgraf ze Merhern etc. Erbern weisen und lieben getrewn. Wir lassen ew wissen daz wir mit den herren lantleuten und Steten von Behem die yetz hie sind uberain komen sein uns auf morgen hie zu erheben und mit In gen Prag ze ziehen damit wir auf sant Johannistag ze Sunnwenden schierst-kunftigen daselbs ze Prag zu dem kunigreich zu Behem gekronet werden. Zu derselben unserr kronung die lantschafft in Behem gevordert ist. Nu koment uns stetleich gewiss wornung wie sich der kunig von Polan nach anweisung ettlicher Behem hab zugerichtt und mit seiner macht heraus von Krakaw zehen meil getzogen hab und main in das kunigreich Behem zu ziehen und uns und unser liebe Gemaheln an unserr gerechtikait die wir dartzu haben wider got und allen gelimphen ze irren und anzegreiffen des wir uns doch mit hilff des almechtigen gots widersetzen und das underkomen wellen so wir pest kuennen und muegen. Emphelhen wir ew begern und wellen gar ernstleich daz Ir mit volkh so Ir des maist aufbringen mugt wolgetzewgt und zugerichtt mit harnasch wegen und andern notdurften wenn wir oder unser Anwelt ew empieten dann unvertzogenleich aufseyt und ew an die stat so ew wirdet verkundet fueget dann verrer mit andern unsern lantleuten und Stetn die wir auch gevordert haben untz an die Gemerkh unsers lannds Osterreich ze ziehen und uns wider die egemelten unser veind beygesteet und helffet als wir ew des sunder wol getrawen und als Ir uns des phlichtig seyt das wellen wir genedikleich gen ew erkennen. Geben zu der Igla an Montag vor sant Veitstag. Anno etc. tricesimo octavo unserr Reich des Roemischen und ze Hungern etc. in dem ersten Jar under unserm Insigil das wir in unserm furstentum Osterreich geprawhen. ad man(da)tum d(omini) r(egis) in cons(ilio).

Source Fulltext: Peter Peusquens