Albrecht von gotes gnaden, Roemischer Kunig zu allen zeiten merer des Reichs ze Ungern Dalmatien Croatien etc kunig, Erwelter kunig ze Behem, Hertzog ze Oesterreich, und Marggraf ze Merhern etc. Erbern weisen und lieben getrewn. Als ir uns yetz von des Patriarchen und..der Venedier wegen habet geschriben. Das haben wir vernomen. und lassen ew wissen, daz wir demselben Patriarchen yetz schreiben, und In pitten, daz er die sachen uns zu gevallen guetleich lass angesteen. Begern wir an ew mit fleiss, daz ir ew mitsambt unserm lieben frewnt .. dem von Passaw .. dem Bischoven von Vintzenss und dem Probst zu sant Stephan, den allen wir yetz, auch darumb schreiben, zu dem vorgenanten Patriarchen fueget und In von unsern wegen pitt und underweiset, so ir pest kuennet und muegt, daz er solich anslahen seiner Behabbrief und Interdicte zu disem mal ze Wienn underwegen, und die Venedier, die in unserm gelaitt zu uns koement, unbekumert lassen, uns zu sundern eren, und gevallnuss. Wer aber daz er nicht ablassen, und unser darin nicht schonen wolt des wir Im, doch, nicht getrawn daz ir all dann, ander weg fur ew nemet, wie ew, das bedunkt fuegsam sein, damit den Venediern in unserm Gelaitt, solich widerwertikait nicht widergeen. Daran begeet Ir unser maynung. Geben zu der Igla an Samstag nach sant Erasmstag. Anno domini etc. Tricesimo octavo. Unserr Reich des Roemischen und ze Ungern etc. in dem ersten jare. under unserm Insigl, das wir in unserm fuerstentum Oesterreich geprauhen. com(missio) propria domini Regis facta in cons(ilio).

Source Fulltext: Peter Peusquens