Albrecht von gotes gnaden Roemischer Kunig, zu allenzeiten merer des Reichs, ze Ungern, Dalmatien und Croatien etc. kunig, Erwelter kunig ze Behem, Hertzog ze Osterreich, und Markgraf ze Merhern etc. Erbern weisen und lieben getrewen. Wir lassen ew wissen, daz uns menigerr gewiss botscheft komen sein, daz sich..die von Polan mit aller macht zuogerichtt haben, und sich yetz erheben, und mainen uns, an unserm Kunigreich ze Behem, und andern unsern landen Ingriff und Irrung zetun, darumb wir uns morgen, von hinn erheben, und an alles vertziehen, hinIn gen Behem fuegen, und denselben von Polan alsverr wir Imer kunnen, und muegen, wellen widersteen, und wan grosse notdurft ervordert, daz wir allenthalben in unsern kuenigreichen, und landen, bestellen, daz die, von denselben unsern veinden, unbeschedigt beleiben . Emphelhen wir ew, und wellen ernstleich, daz Ir ew, mit wegen, tzeug, harnasch, und allen andern notduerften zuorichttet, und offentleich lasset beruffen, daz sich yederman, darnach schikh, wenn wir, oder unser Anwelt, ew schreiben, oder empieten, daz Ir dann, an alles vertziehen, berait, und auffert, und ew, an die Gemerkh des Lands ze Oesterreich, als man ew wirdet zu erkennen geben, fueget, damit wir unsern veinten, widersteen und unser land unbeschedigt, behalten muegen, und getrawn ew wol, daz Ir darin kain vertziehen tuot. Daran tuot Ir gentzleich unser maynung, und wellen das, gen ew, in sundern gnaden erkennen. Geben ze Znoim, an Eritag, in den Phingstveirtagen. Anno etc. Tricesimo octavo, unsrer Reiche, des Roemischen, und ze Ungern etc. im ersten jar, under unserm Insigl, das wir in Oesterreich geprauchen. com(missio) propria d(omini) r(egis) in cons(ilio).

Source Fulltext: Peter Peusquens