Wir Thoman von Gottes genaden abbt ze Lambach bekennen mit dem brief, das uns an ainem besigelten aufgabbrief aufgesanndt habent Angnes, weylandt Alexen burger ze Lynntz seligen witib, und Jacob ir sun, darinn mit vleyzz gebeten, das wir daz gut, genant daz Ruczmansgut auf dem Urach mit aller seiner zugehorung, so von altter und durch recht darzu gehort, darinn nichts ausgenomen noch hindan gesatztt angever, in Gunskircher pharr gelegen, dem Rudlein auf dem benanten gut gesessen, seiner hawsfrawn Anna und irn baiden erben geruchten zu bestetten und verleichen, daz da eribrecht ist von uns und unserm gotshaws, des wir underweist worden sein mit briefleicher urkund, ausganngen von unserm vorsedel abbt Johannsen seliger gedachtnuzz, wenn sew in das kawfleichen ze kauffen gegeben hieten umb ain sum gelts, der sew gantz und gar ausgerichtt und beczalt worden sind zu rechtten tagen an allen schaden. Also haben wir im, dem benanten Rudlein, seiner hawsfrawn Anna und irn baiden eriben das benant gut mit aller seiner zugehorung zu rechttem kauff und eribrecht bestett und verlichen, was wir in rechtleichen daran bestetten und verleichen sulln oder mugen, doch daz man uns und unserm gotshaws all jar jarleichen davon raichen und dienn sol zu unser lieben frawntag der dienstzeit funffczigk Wienner phenning. Es sind auch die obgemeltten Angnes, ir sun Jacob und irer baider eriben des obenanten guts mit aller seiner zugehorung des gemeltten Rudlein, seiner hawsfrawn Anna und irer baider eriben rechtt gwern und furstanndt fur all rechtleichew ansprach, wo und wann in des not und durft beschiecht mit dem rechten, als dann soleichs kaufs, eribrechts und lanndes ob der Enns recht ist. Wir offen auch, das sy kainerlay wanndlung damit nicht haben sulln in kainerlay weys an unser hanndt und gutem willn, und sulln uns auch alles das davon leyden und dulden, das annder unsers gotshawss eribler gein uns leydent und duldent unverczigen unsers gotshawss rechten in allen sachen. Ze urkund geben wir in des also den offenn brief, besigeltem mit unserm anhanngundem insigel. Geben als man zalt nach Kristi geburde in dem vierczechenhundertundvierczigisten jaren an mantag vor sannd Peter und sannd Paulstag der heiligen zwelifpoten.