Dem erwirdigen und geistleichen herren herrn Thoman abbt ze Lambach embeut ich Hanns Salmansleitter als ain gerhab anstat Jorigen des Salmansleitter, meins vettern seligen chinder, mein willig diennst bevor. Ich hab verchauft von notdurft wegen des benanten meins vettern chinder das gut zw Od, so ich von eurn genaden und eurm goczhaws ze lehen hab, gelegen in Penibanger pharr, dem edlen und vesten ritter, herren Jorigen dem Perkchaimer, Susanna seiner hawsfrawn und iren peder eriben, da senndt ich euch dieselben lehen anstat mein selbs und meins vettern chinder widerumb auf mit dem brief, und bitt eur genad, ir wellet dasselb benant gut zw Od mit seiner zuegehorung dem egenanten herrn Jorigen dem Perkchaimer, seiner benanten hausfrau und iren beder eriben geruechen ze verleichen und den chauf bestetten, das ist mein gutleich wil und wort, und wil auch das gern umb euch und umb eur goczhaws verdienn. Und ich gelob auch euch anstat mein und meins vettern chind, die noch bey irn vogtpern jaren nicht sein, das wir euch darumb hinfur in eur sigel nicht reden wellen in chainerlay weis ungeverleich. Und wann ir das getan habt, so sag ich euch der lehen muessig und ledig. Mit urchund des briefs under meinem obgenanten Hannsen des Salmansleitter aigen aufgedrukchten insigel, und zu geczewgnus hab ich mit vleis gepetten den erbern und weysen Hannsen den Halczinger, mein lieben sweher mit seinem aufgedrukchtem insigel, im und sein eriben an schaden. Geben an phincztag vor sand Peter und sand Pauls tag der heiligen zwelifboten anno Domini etc. xlmo.