Wir Thoman von Gottes genaden abbt ze Lambach bekennen mit dem brief, das fur uns komen sind Thaman, Lienhart, Andree, gebruder, und ir swester Anna, Hannsen des Pekchen ze Hag hawsfraw, Ulreichs des Kaufman weylandt ze Niderentarn seligen kinder, und habent mit wolbedachtem mut und gutem willn recht und redleichen verkaufft ir vier sechstail aus ainem viertail aus der Obernhub ze Nidernentarn, gelegen in Geboltskircher pharr, und eribrecht ist von uns und unserm gotshaws, irm lieben swager und swestern Thoman dem Kursner, seiner hawsfrawn Elsbethen und irn baiden eriben umb ain sum geltz, der sew gantz und gar entricht und beczalt worden sein zu rechtten tagen an allen schaden, dann ain sechstail an dem benanten viertail, ist der yetz benanten Elsbethen recht vaterleichs und muterleichs erib, des wir alles underweist worden sein mit urkunden, ausganngen von unserm vorsedel abbt Johannsen seliger gedechtnuzz. Also haben wir im dem benanten Kursner, seiner hawsfrawn Elsbethen und irn baiden eriben funff sechstail an dem benanten virtail aus der gemeltten hub mit aller zugehorung zu rechttem kauf und eribrecht bestett und verlichen, was wir in rechtleichen daran bestetten und verleichen sulln oder mugen, doch daz man uns und unserm gotshaws all jar jarleichen davon raichen und dienn sulln nach innhaltung unsers gotshaws urbarpuch lawtt und sag. Es sind auch die obgemeltten geswistred Thaman, Lienhart, Andree, Anna und all ir eriben irr vier sechstail sechstail aus ainem viertail aus der obenanten hub mit aller zugehorung des benanten Kursner, seiner hawsfrawn Elsbethen und irer baider eriben rechtt gwern und furstand fur all rechtleichew ansprach, wo in des not und durfft beschiecht mit dem rechten, als dann soleichs kaufs, eribrechtz und lanndes ob der Enns recht ist. Wir offen auch daz sy kainerlay wanndlung damit nicht haben sulln in kainerlay weis an unser hanndt und gutem willn, und sulln uns auch alles daz davon leyden und dulden, daz annder unsers gotshawss erbler gein uns leydent und duldent unverczigen unsers gotshawss rechten in allen sachen. Ze urkund geben wir in des also den offenn brief, besigeltem mit unserm anhanngundem insigl. Geben als man zalt nach Kristi geburd in dem vierczechenhundertundvierczigisten jaren an eritag vor sannd Achaczii tag mit seiner heiligen gesellschaft.