Wir Thoman von Gottes genaden abbt ze Lambach bekennen mit dem brief, das fur uns komen ist Kunrad Hochenperger, burger ze Enns, und hat mit wolbedachtem mut und gutem willen recht und redleichen verkaufft seinen gledt, gelegen in unserm purkchfrid am Stadel zwischen der Scherenpergerin und des Schachen gleden und gledsteten, Hannsen dem Choyan, auch burger ze Enns, seiner hawsfrawn Elzepethen und irn baiden eriben umb ain sum geltz, der er ganntz ausgerichtt und beczalt worden ist zu rechtten tagen an allen schaden. Also haben wir im, dem benanten Choyan, seiner gemeltten hawsfrawn und irn baiden eriben den gemeltten gledt mit seiner zugehorung zu rechttem kauf und purkchrecht bestett und verlichen, was wir in rechtleichen daran bestetten und verleichen sulln oder mugen, doch daz man uns und unserm gotshaws all jar jarleichen davon raichen und dienn sol ze purkchrecht zu sannd Michelstag dreyssigk Wienner phenning. Es ist auch der obgemeltt Hechenperger und all sein erben des gemeltten gledt mit seiner zugehorung des benanten Choyan, seiner hawsfrawn Elzpethen und irer baider eriben recht gwern und furstanndt fur all rechtleichew ansprach, wo in des not und durft beschiecht mit dem rechten, als dann soleichs kaufs, purkchrechts und lanndes ob der Enns recht ist. Wir offen auch, das sy kainerlay wanndlung damit nicht haben sulln in kainerlay weis an unser hanndt und gutem willn, und sulln uns auch alles daz davon leyden und dulden, daz annder unsers gotshawss lewt gesessen in unserm purkchfrid am Stadel von solhen gleden und gledsteten gein uns leydent und duldent unverczigen unsers gotshawss rechten in allen sachen. Ze urkund geben wir in des also den offenn brief, besigeltem mit unserm anhanngundem insigel. Geben als man zalt nach Kristi geburd in dem vierczechenhundertundvierczigisten jaren an freitag nach sannd Veitstag