Dem erwirdigen und geistleichen herren herrn Thoman abbt zw Lambach unserm genedigen herren embietten wir ich Agnes, weylent Alexen purger zw Lincz seligen hawsfraun und ich Jacob ir sun unser willig gehorsam diennst. Wir haben verchauft das Churczmansgut auf dem Urech dem Ruedlein, der yeczund auf dem gut siczt, Anna seiner hawsfrawn, so wir dann von eurem genaden zu erib haben, da sendt wir eurn genaden dasselb gut widerumb auf mit dem brief und bitten eur genad mit allem und sunderm vleis, ir wellet in denselben chauf also bestetten und besiglen nach eurs goczhaws gewonhait und rechten, das ist unser gutleich wil und wart, und wellen auch das gern umb eur genad verdienn und senndten euren genaden darauf den brief under der erbern und weysen Wolfgangs des Churczen und Hannsen des Hobschen baid purger zu Wels aufgedrukchten insigel, die wir mit vleis darumb gepetten haben, in und iren eriben an schaden. Geben am phincztag nach sannd Veycztag anno Domini etc. xlmo.