Ich Agnes ze Haslach, ich Stepffann zu Choppel und Kathrey mein hawsfraw, ich Stepfann Mair zu Wuffing, ich Niklas Huebmer zu Wuffing, ich Ull Seydel zu Pemsstorff, ich Margret Haupuchlin ze Wuffing, ich Hainczel Stux und all unser erben enpeutten dem erwirdigen geischleichen herren und prelatten abbt Thoman ze Lambach unsern willigen gehorsamm diennst. Wir haben von euren gnaden und under euren goczhaus ein viertail aus der hueb zu Chirchdorff und zway tail aus einem drittail aus der benenten hueb gelegen in Gaspolczhover pharr, denselben unsern benanten erbtail sentten wir euren gnaden auf und pitten, eur gnaden wellet denselben unsern erbtail geruchen ze verleihen Micheln ze Holczing, seiner hausfrau Anna und allen iren erben bestatten ze einem rechten chauff mit brieff und euren sidel, daz ist unser gutleich wil und vleizzig pett, und sullt ir und eur goczhaus dez von uns und von unsern erben albeg unengolten und an schaden peleiben. Mit urchund dez petbrieffs vesidelt mit dez edlen Hannsen dez Pausbechken zu Putting aufgedrukten insigel, den wir und anstat aller unser erben vleizzig gepeten haben, daz er sein sidl auf den brieff gedrukt hat durich unser vleizziger pet willen, ym und allen seinen erben an schaden, und zu pesser zeugnuzz verpetschafft mit dez ersamen Mertein dez Altags aufgedrukten petschafft, daz er auch auf den petbrieff gedrukt hat auch durich unser vleizziger pet willen, ym und allen seinen erben an schaden, wann dy sach alle vor ym gehandelt und geschehen ist, wann er der grunt dy zeit amptman ist gewesen. Geben an sand Mathias dez heyligen zwelfpotntag nach Christi gepurd xiii hundert jar und in den sibenunddreissigsten jar.