Wir Thaman von Gotes genaden abbt ze Lambach, bechennen mit dem brief, das fur uns chomen ist Steffan Per und hat mit wolbedachtem muet und mit guetem willen aller seiner eriben rechtt und redleichn gemacht und gegeben seiner eleichen hawsfrawn Margrethen, Kuenczen des Hofmann tachtter, zehen phund phening ze rechtter margengab auf seinen geleychen eribtayl, so er hat an der Pernhueb ze Obennswayg in Newnkircher pharr. Also haben wir ir der benanten Margrethen den gemelten gleychen eribtayl und dye gemelten zehen phund phenning ze rechtter margengab darauff bestett, als margengab und lantz recht ist, doch in der beschaiden, das man uns und unserm goczhaus alle jar davon dienn sol nach innehaltung des rechtten eribrecht briefs. Es ist auch der benant Stephan Per und all sein eriben des gemelten eribtayls und gemechts darauff der gemelten seiner hawsfrawn und irer eriben ir rechtt gewern und furstand fur all rechtleyche ansprach, als offt ir des mit recht, not und durft geschiecht, als dann solichs gemechts, margengab und lantz ob der Ens recht ist. Es habent auch sein nagst eriben nach seinem abgang alle jar von ir oder iren eriben zu der liechtmess vor oder darnach in den nagsten vierczehen tagen lasung umb dye gemelten zehen phund phening und nicht hoher. Wir melden auch, das sy kaynerlay wandlung damit nicht haben sullen in chainer weyse an unser handt und gueten willen, und sullen auch alles das davon leyden und dulden, das annder unnsers goczhauss eribler gein uns leyden und dulden unverczigen unsers goczhaus rechten in allen sachen. Des ze urkund geben wir in den brief, besigelten mit unnserm anhangunden innsigel, der gegeben ist nach Krist gebuerde vierczehenhundert jar und dannach in dem sybenunddreyssigissten jare an mantag vor Letare in der vassten.