Dem erwirdigen und geistleichen herren herrn Taman abbt zu Lambach embeut ich Jorig Wisinger purger zu Lincz mein willig diennst. Ich hab vormalen von eurm vorvodern seligen abbt Johannsen dem Dachsperiger ain guetel emphangen als ain gerhab innhaber und als ain lehentrager anstat meiner lieben swester Annen, Lienharten des Topler hawsfraw, purgerin zu Wels, und das mit tode an sey geeribt, was genant dacz Aich in Gunskircher pharr gelegen, und ist erib von eurm goczhaws ze Lambach. Daselb guetel mitsambt seiner zuegehorung hab ich widerumb ubergeben der benanten meiner swester. Also gib ich eurn genaden das guetel auf und bitt eur genad, ir wellet ir und irn eriben, oder wem sy das verner schaffet oder ubergeit, verleichen in aller gerechtichait, also ichs innegehabt und genossen hab, das wil ich gern umb euch verdienn, und wann ir das getan habt, so sag ich euch und eur goczhaws darumb ledig und lazz und senndt eurn genaden des den brief under des erbern und weysen Walfgangen des Churczen, ainer des ersamen racz zu Wels, mit seinn aufgedrukchten insigel, den ich mit vleis darumb gepetten hab, im und sein eriben an schaden, wann ich dieczeit aigen insigel nicht anhett. Der brief ist geben am phincztag vor dem vaschangtag anno Domini etc. xxxviio.