Wir Thaman von Gotes gen[ade]n abbt ze Lambach bekennein, das fur uns kommen sind Elspeth, Hannsen des Paurenschieken seligen [ta]chtter, Thoman, Pantheleons von Lowhen sun, und Hanns Pranttmair anstat seiner swesster kinnder, und habent miteinander veraintleichen und mit guetem willen aller irer eriben rechtt und rechtleichen verchaufft all ir gerechtigkait, so sy gehabt habent an dem Pawrenschieken guet mit seiner zwegehorung, gelegen in Puchler pharr, irem brueder und vettern Willpolden dem Pawrenschieken, seiner hawsfrawn Dorothee und iren baiden eriben umb ain gelt, des sy gants beczalt sind, und die ander gerechtigkait alle, was da ist sein erib, alles von uns und unserm gotshaus, des wir erweist warden seinn mit urchund, dye sy gehabt habent. Also haben wir dem gemelten Willpolten, seiner hausfrawn Dorothee und iren baiden eriben das vorgemelt guet gants und alles mit aller seiner zuegehorung, darinne nichts ausgeczogen noch hindan gesundert, ungeverleichen verlihen und bestett zu rechtem eribrecht in der beschaiden, das sy uns und unserm gotshaus alle jar jerleichen davon dienn und raichen sullen nach innehalttung unsers urbarpuechs. Dye vorgemelten Ellspet, Thoman und Hanns und ir aller eriben sind auch des vorgemelten Willpolden, seiner hausfrawn und irer baider eriben der benanten irer gerechtigkait, so sy gehabt habent, ir rechtt gewern und furstand fur all rechtleich ansprach, als offt in des mit recht, not und durft geschiecht, als dann solichs chauffs, eribrechts und lants ob der Enns recht ist. Wir melden auch, das sy chainerlay wandlung damit haben sullen in chainerlay weis an unser handt und gueten willen, und sullen auch alles das davon leiden und dulden, das ander unsers gotshaus eribler gein uns leiden und dulden unverczigen unsers gotshaus rechten in allen sachen. Des ze urkund geben wie in den brief, besigelten mit unserm anhangenden insigel, der gegeben ist nach Christ gebuerde vierczehenhundert und darnach in dem sechsunddreysigisten jar an mitichen nach sand Ellspethen tage.