Ich Michel Haperger, burger ze Ambsteten, ich Margreth sein hausfraw, und ich Johannes Hoffkiricher, burger ze Velden, bekennen an dem offen brief fur uns all unser eriben, frewnt und nachkomen, das wir verkaufft und zu kauffen gebem haben unsern geleichen eribtail und all unser gerechtichait, so uns von unserer mueter saligen Annan gesessen yn der Grub yn Polhaimer pharr, anerstorben ist, den wir pey den Sunleytnern auf dem guetlein auf der Wamwasod und auf dem gutlein auf dem Prunn gehabt haben, das da berurt lehen von dem erwirdigen geystleichen herren hern N. abbt ze Lambach yn Pachmanner pharr und Starhemberger gericht gelegen, dem erbern Chunraden Scherer burger zu Grieskirichen, unserm lieben swager, Elspeten seiner hausfrawn unserer lieben swester, allen iren baiden eriben und nachkomen aus unserer gewalt, nucz und gewer yn die iren. Also pitten wir den erwirdigen geystleichen herren hern N. abbt ze Lambach, mit sunderm fleyss, das er dem benanten Chunraden Scherer, Elspeten seiner hausfrawn, iren baiden eriben und nachkomen brieff und sygel umb den vorgenanten kauff vertigen und geben welle, das ist unser fleyssig gepete und will und geben ym des zu zeugnuss, das wir umb das sygel gepeten haben unsern pettbrieff under des erbern weysen Lewppolden Sporel, dieczeit phleger ze Tegernbach, auffgedrukten ynsigel, besigelten, den wir mit fleys darumb gepeten haben, ym, sein eriben und sygel an schaden. Der gebett umb das ynsigel sind zeugen die erbern Gorig Hoffkiricher von Ambsteten, Lienhart von Regensdorf, Hanns Fleyschakcher burger ze Grieskirichen. Der brieff ist geben an sannd Elspetentag, als man zalt von Christz gepurd vierczehenhundert jar und darnach yn dem sechsunddreyssigisten jar.