Wir Johanns von Gotes genaden abbt ze Lambach bekennen mit dem brief, das fur uns komen ist Ulreich Topler ze Ottingdorf und hat mit wolbedachtem muet und gueten willen seiner hawsfrawn und aller irer baider eriben mit unnser handt und ganczer stet rechtt und redleichen uber gegeben all sein gerechtigkait, so er gehabt hat an dem Topelguet ze Ottingdorf, gelegen in Ansvellder pharr, seinem lieben sun Hannsen und seiner hawsfrawn Barbaran. Also haben wir den benanten Hannsen, seiner hawsfrawn und iren baiden eriben das egemelltt guet mit aller seiner zuegehorung, darinn nichts ausgenommen angever, verlihen und bestett ze rechttem eribrecht in der beschaiden, das sy uns und unserm gotshaus alle jar jerlich da von dienn und raihen sullen an sand Jorigen tag zehen Wienner phening, und schullen auch alle jar des nagsten phincztags nach sand Jorgen tag in daz tayding gein Winpposing kommen, und sy sullen in auch kainen andern herren und vogt nicht nemmen, und wir mellden auch, das sy kainerlay wandlung da mit haben in kainerlay weis an unser handt und gueten willen, und sy schullen auch alles das davon leiden und dulden, das ander unsers gotshauss eribler gein uns leiden und dulden unverczigen unsers gotshaus rechten in allen sachen. Der obgemelt Ulreich und sein eriben verczeihen sich des egemelten guets, das sy noch ir eriben nach niemandt von iren wegen furbas kain ansprach darnach nymmer haben sullen in chainerlay weis getrewleich angever. Des ze urkund geben wir in den brief besigelten mit unserm anhangunden innsigel, der gegeben ist nach Kristt gebuerde vierczehen hunndertt jar und dar nach in dem drew und dreyssigisten jar an erichtag nagst vor gotsleichnam tage.