Wir Johanns von Gotes genaden abbt ze Lambach bekennen mit dem brief, das fur uns komen sind Ellspeth, Meinharten ze Oberndorf seligen hawsfraw, und ir tachtter Dorothee, und habent wolbedeechtig und mit guetem willen aller irer eriben rechtt und redleichen verkaufft das guet ze Mulporcz mit aller seiner czuegehorung, gelegen in Swannser pharr, irem brueder und vettern Hannsen dem Toller und all seinn eriben umb ain summ gelts, des sy gants beczalt sind. Also haben wir dem benanten Tollr und seinn eriben das egemelt guet mit aller seiner zuegehorung, so von allter und durich rechtt darczue gehort oder da von bechomen mag, dar inn nichts ausgenomen angever, verlihen und bestett zu rechttem eribrecht in der beschaiden, das man uns und unserm gotshaus alle jar jerleich da von dienn und raihen sol an sand Jorigen tag funf allter Wienner phening und ain vaschang huen. Es sind auch die obgemelten Ellspeth und Dorothee und ir baider eriben des egemelten guets und aller zuegehorung des vorgemelten irs brueder und vetter Hannsen des Toller und aller seiner erben ir rechtt gewern und furstand fur all rechtleich, als offt in des mit recht, not und durftt geschiecht, an aller stat fur all rechtleiche ansprach, als dann solichs kawffs, eribrechts und lannts ob der Enns recht ist. Wir melden auch, das sy chainerlay wanndlung da mit haben schullen in chainerlay weis an unser handt und gueten willen, und sullen auch alles das da von leiden und dulden, das annder unsers gotshawss eribler gein uns, unserm nachkomen und gein unnserm gotshaws leiden und dulden und unverczigen unnsers gotshawss rechten in allen sachen. Des ze urkunde geben wir in den brief, besigelten mit unnserm anhangunden innsigel, der gegeben ist nach Kristt gebuerde vierczehen hundert jar und dar nach in dem drew dreissigisten jar an sand Gregorgentag.