Wir Albrecht von Gotes gnaden herczog ze Osterreich, ze Steir, ze Kernden und ze Krain, markgraf ze Merhern und graf zu Tirol etc. embieten unsem lieben getrewn Reinprechten von Walsse unserm haubtmann ob der Enns unser gnad und alles gut. Wir haben vernomen, wie meniger gross zerung durch stetige gastung geschehen in dem kloster zu Lambach von edeln und unedeln, die dahin komen und da ir niderlegung auf dem kloster haben und verczeren, das weilent unser vorvordern und ander frumm leut durch Gots willen dahin gegeben habent, damit sich die geistleichen leut darinn wonund da aufhalten und Got dienen solten, das aber durch solch umpilleich gastung verczert werd, das uns grozleich missvelt, wan dasselb goczhaus dadurch in gross abnemen komen ist, und noch in grossers komen mochtt, ob das nicht wurd understanden. Davon emphelhen wir dir ernstleich und wellen, daz du im von unsern wegen solher gastung vesticleich vorseist und nicht gestattest, daz in und sein goczhaws yemant damit bekumer noch beswer in dhain weis, wan wir das ernstleich mainen. Geben ze Wienn an freitag nach sant Michelstag anno etc. tricesimosecundo.