Wir Albrecht von Gotes gnaden herczog ze Osterreich, ze Steir, ze Kernden und ze Krain, markgraf ze Merhern und grave zu Tirol etc., embieten unsern getrewn lieben n. allen unsern ambtlewten und burgern ob der Enns, den der brief geczaigt wirt, unser gnad und alles gut. Uns hat furbracht des ersam geistleich unser lieber andechtiger n. der abbt zu Lambach, wie ir seins gotshawss leuten ze Lambach gesessen nicht wellet gunnen mit wein und anderm gewerben ze arbaiten in den freyhaiten und rechten, als dasselb gotshaws und sein lewt von alter her getan und darumb brief haben, daz si solicher arbait recht haben. Emphelhen wir ew und wellen ernstleich, daz ir si die egemelt arbait mit wein und anderm ding diczmals ungeirret treiben lasset und si daran nicht hindert, wan wir in willen haben unser ret in kurcz hinauf uber die Enns zu schikhen, die sich dann lautter von solicher hanndlung wegen ervarn und auffundig machen sullen, bey wen es hinfur besteen sulle, daran begeett ir gaenczleich unser maynung. Geben zu Wienn an freytag nach sant Michelstag anno domini etc. tricesimosecundo.