Wir Johanns von Gotes gnaden abbt ze Lambach bechennen mit disem offen brieff, das fur uns komen ist Hanns Fragner und hat mit wolbedachtem mut und gutem willen seiner hausfrawen Kathrein und ir baider eriben mit unserer hant und ganczer bestetung recht und redleich verkaufft ain haus und hofmarich mit aller seiner zugehorung, gelegen in unserm purkfrid ze Lambach zwischen des Pawdechsleins und des Zakans hawser Christoffen dem Grat, seiner hausfrawn Zecilgen und irn baiden erben umb ein summ gelts, der sy gancz ausgericht und bezalt sein ze rechten tagen an schaden. Also haben wir dem benanten Christoffen, seiner hausfrawen und iren baiden eriben das egemelt haws mit seiner zugehorung, darinn nichts ausgenomen angevar, bestett und verlihen ze rechtem purkrecht in der beschaiden, das sy uns und unserm goczhaws alle jar jarleich davon dienen und raichen sullen nach innhaltung unsers goczhaws urbar puchs. Es ist auch der obgenant Hanns, sein egemeltew hausfraw, und ir paider eriben des benanten hawss und allen zugehorung des benanten Christoffen, seiner hausfraw, und ir paider eriben irrer rechter gewer und furstant fur all rechtleich ansprach, als offt in des mit recht, not und durfft geschiecht, als danen solchs kauffs, purkrechts und lancz ob der Enns recht ist. Wir offen auch, sy sullen kain wandlung da mit haben in chainerlay weis an unser hanndt und guten willen, und sullen auch alles das da von leiden und dulden, das ander unsers goczhaws lewtt gesessen in unserm purkfrid ze Lambach leiden und dulden, unverczigen unsers goczhaws rechten in allen sachen. Des ze urchund geben wir in den brieff, besigelten mit unserem anhangundem insigel, der geben ist nach Christi geburd vierczehenhundert jar und darnach in dem zway und dreissigisten jar an aller seelen tag.