Ich Hanns der Chramer von Wels vergich fur mich und all mein eriben und tun kunt offenlich mit dem brief allen, den die man sehent, hornt oder lesent, das ich recht und redlich zu der czeit und ich es mit recht wol tun macht, zu ainem rechten eribrecht geben hab Stephan den Plachenmullner, seiner hausfraun Annen und iren paiden leiberiben ain Ort in meiner Aw czwischen des wagenweg und des Chaltenprunn und von des jungen Liebleins wis unczt an des Schawr wis, das si das hinfur innehaben, nuczen und nyessen schull, und hab in das ingeantwurt aws meiner nucz und gewer in der beschaiden, das sie mir oder mein eriben alle jar davon zu dienst raichen und geben schullen zu unser frawntag der dinstzeit an zehen phening, ain halbs phunt Wienner phening und nicht mer. Und als offt si den dinst virczehen tag versiczent nach der dinstzeit, als offt gent czwen und dreissig phening zu wanndel, darauf gebent si dienst und wanndel nicht in sechs wochen, so habent si ir eribrecht verlorn und ist uns, mir und mein eriben verfallen. Si mogen auch wol mit irem eribrecht allen iren frum schaffen mit verseczen, verchauffen. Und wie sich das eribrecht verbanndelt, wer denn aufgeit, der sol geben czweliff phening, und wer aufnymbt czweliff phening und nicht mer. Ich und mein eriben sein auch des obgenanten Ort und eribs ir recht gewern und furstant fur alle ansprach, wo in des not und durfft geschiecht, also eribrechcz recht ist in dem lannde ob der Enns. Des czu urchunt gib ich in den brief mit meinem anhangundem insigel, der geben ist an sand Luczeintag du man zalt von Christi gepurdt virczehenhundert und in dem zwaiunddreissigisten jare.