Dem erwierdigen geistlehen herren heren Hansen abbt zw Lambach enpieten wir ich Hanns, ich Barbara, ich Urschula, alle drew geswistreyt und Hainreichs des Hefftperger saligen chinder unser willig gehorsam dinst. Wir haben von ewren gnaden und ewrem goczhaws ain zehennt zu lehen auf dem oberen guet zw Mulpach und auf der mul daselbs, gelegen in Gaspoczhofer pharr und in Starhenberger gericht. Den selbigen zehent und allew unsre rechten, so wir daran gehabt, schikch wir ewren gnaden hie in auf und piten ewr gnad, ir wellet den selbigen zehent geruehen zu verleihen dem Mair zw Sneczling, seiner hawsfrawn und all sein eriben und bestetten zu ainem chawf mit ewrem brief und sidel, das ist unser obgenanter und aller unser eriben vleissigs gepet und sult auch des ir und ewr goczhaws hinfur an all zuespruch und scheden beleiben, und schikhen des ewren gnaden den brief zw gedechtnus besigelt mit des erberen und weysen Fridreichs des Perchaimer, diezeyt ambtman in der Gebolczchirchen aigen aufgedruchtem insigel, der das durich unser obgenanter vleissigen pet willen auf den brief gedrucht hat, im und sein eriben an schaden und sind auch zewgen, das wir vleissig umb das sidel gepeten haben, die erbern nachgeschriben frumen lawt am ersten Michel Haselawer, Toman Obenaws, payd purger zu Hag im marcht, und ander frum lawt. Der brief ist geben nach Kristus gepurd virzehennhundert jar und darnach in dem zwayunddreisgisten jar des suntags vor sand Tomanstag.