Ich Margret, Thoman des Knollen burger ze Wells hawsfraw, vergich fur mich und all mein erben umb den eribtail, so mich und mein bruder Hannsen, Thoman und Micheln anerstarben ist an dem urvar und an der vischwaid in der Aw ze Lambach gelegen, und ist erib von dem erwirdigen gotzhaws ze Lambach von unser aller bruder saligen Wolfgangen dem Stosser, weillent auch burger ze Wells, habent mich die benanten mein bruder meins tails liebleich und frewntleich nach frumer lawt rat und underweisung ausgericht und gantz betzalt mit beraitem gelt, daran mich wol genugt hat, darumb ich mich und all mein erbn des obgenanten unsers bruder eribtails gantzleich vertzigen haben, und vertzeichen uns auch des wissenleich in kraft ditz briffs allso, das ich noch all mein erbn von des benanten eribtails wegen nymermer dhainn zuespruch noch ansprach haben sullen noch gewinnen weder mit recht noch an recht in dhainerlay weis angeverd. Mit urchund des brifs, versigelt mit der erbern weisen Wolfgangen des Tewrwanger, diezeit richter ze Lambach, und Jacobn des Dachsperger paider anhangunden insigeln, dew ich und anstat aller meiner erbn mit vleizz daumb gebeten han, in und irn erbn an schaden, darunder ich mich benantew Margret und mein erbn verpinden mit unsern trewn in aydesweis alles das stet ze haben, das der gegenwurtig brif innehalt, der geben ist an phintztag nach unser frawntag ze der dinstzeit nach Christi geburd viertzehenhunndert jar, darnach in dem zwayundzwaintzigisten jar.