Ich Nikla, ich Jorig, ich Katrey, geswistred, Gunndleins von Erlach saligen chinder, vergehen offenleich mit dem brif, das wir uns liebleich und frewntleich veraint und verricht haben mit unserm lieben brueder Mertten ze Erlach und seinen erben umb allen den eribtail, so wir gehabt haben an dem gut ze Erlach, das gelegen ist in Lambekcher pharr, und ist eribrecht von dem erbern weisen Hannsen dem Pawswekchen und seinnen erben, wann uns der benant unser bruder mit beraiten gelt darumb genug tan hat, daran uns wol genugt hat, darumb wir uns des benanten guts mit seiner zugehorung verczeichen wissenleich mit dem brif allso, das wir noch unser erben noch ander niemant von unsern wegen hincz dem benanten unserm bruder noch seinnen erben von des egenanten guts wegen nimmer mer dhain zuspruch noch vordrung haben sullen noch gewinnen in dhainerlay weis ungeverleich, uns geb dann der tod mit recht icht wider, desselben wir uns nicht vertzeichen. Des ze urchund geben wir in den brif, versigelt mit des benanten Hannsen des Pawswekchen, des guts eribherr, anhangundem insigel, den wir mit vleizz und an stat aller unser erben darumb gebeten haben, im und seinen erben an schaden und unengolten aller ir rechten und vordrung darunder wir uns verpinden mit unsen trewn alles das stat ze haben, das an dem brif verschriben stet, der geben ist an Gotsleichnamstag nach Christi geburd viertzehenhunndert jar, darnach in dem ainsundzwainczigisten jar.