Dem erwirding geistleichen herrn hern Jacoben abbt zu Lambach enbeut ich Chasspar Hawnolt burger zu Wels mein willig dienst. Ich hab von ewch und ewrm goczhaws ain hoff und mullen zu erib, genant zu Strazz, gelegen bey dem Aytterpach, zwischen Albrechczdorff und Leyten in Staynekiricher pharr, das hab ich alles verchaufft und zu chauffen geben Chunraten dem Schrekchmair, seiner hausfrau Chathrein und iren eriben und gib ewrn gnaden das alles auf mit dem offen brieff und pit awz wirdichait in das also zu verleyhen, das wil ich gern umb ewch verdienn. Zu urkunt mit meinem aygen aufgedrukchtem insigel, geben an dem heyling phyngstabent anno etc. vicesimoprimo.