Dem ebirdigen geistleichen herren hern Jacoben abpt ze Lambach enpewt ich Marigret, Ubeichs des Ygelmairs zu Wels saligen tochter mein billig dienst umb daz drittail, daz ich hab auf der mul ze Wimpassing, und daz von ewern gnaden und dem goczhaws ze Lambach lehen ist, daz selbig drittail sennt ich ewch also auf mit dem gegenburtigen brief und pitt ewr gnad, ir wellet daz leichen meinem lieben eleichen wirt Chueczen dem Zeilacher, purger ze Lincz, in allen den ern, rechten, alz ez dann von altter herkomen ist, daz ist guetleich mein will und pett. Mit urkunt dez briefs, versigelt mit der erbern und weisen Hannsen von Ordach und Hannsen dez Polan, dyzeit paid dez racz ze Lincz, mit ierer paider aufgedrukchten petschaft, in und ieren erben an schaden, dew ich mit vleiz darumb gepetten hab under dew petschaft ich mich obgenantew Margret verpint mit mein trewn allez daz war und stat ze haben, daz an brief verschriben stet, der geben ist ze Lincz am eritag nach Goczleichnamstag anno xximo jar.