Dem erwirding, geystleichen meinem genadigen herrn abbt Jacoben zu Lambach enbeut ich Michel von Pachaym mein willig dinst. Lieber herr, das guetel, so ich von ewrn gnaden und dem goczhaws hab, genant das Chollerlehen, gelegen zu Mitternlaeb in Puechkiricher pharr, das hab ich verkaufft und geben Hannsen dem Chaser zu Falschpach, und gib ewch das auff mit dem brieff, und pitt ewr gnad, ir wellet ym das leyhen und mit ewrm brieff das steten, das ist gueter mein und meiner eriben will, und wil es auch gern umb ewr gnad dienn. Zu urkunt mit des erbern Wolffkang des Churczen, burger zu Wels, aufgedrukchten insigel, ym und sein eriben an schaden, den ich mit vleizz darumb gepeten hab, und mich darunder verpint mit mein trewn stat zu haben, und geschriben stet an dem offen brieff, geben am samcztag nach Ambrosii anno vicesimo primo.