Dem erwirdigen geistleichen herren hern Jacobn abbt ze Lambach enbewt ich Anna, Wernharts von Haslech saligen witib, mein willig dinst. Genadiger herr, ich lasse ewr gnad wissen, das ich mein margengab acht phunt phenning, so mir mein egenanter wiert saliger gemacht und geben hat als der brif, den ich ewrn gnaden sentt, aufweist, darumb hat mir mein stewfsun Simon mit beraitem gelt genug tan, daran mich wol genugt, und bitt ewr genad, ir wellet dem benanten Simon und seiner hawsfrawn und erben dasselb drittail, daruber der brif lawtt, verleichen und bestatten, das ist mein gutleich will und wart, und sult ir und ewr gotzhaws des allweg an zwspruch und unengolten von mir und meinen erben beleiben. Des ze urchund gib ich ew und ewrm gotzhaws fur mich und all mein erben den brif, versigelt mit des erbern weisen Hannsen des Anhanger ze Paltzing aufgedrukchten insigel, den ich mit vleizz darumb gebeten han, im und seinen erben an schaden, der geben ist an suntag ze mittervasten nach Christi geburd viertzehenhundert jar, darnach in dem ainsundzwaintzigisten jar.