Dem erwirdigen geistleichen herren hern Jacobn abbt ze Lambach enbewt ich Hanns und ich Jacob und ich Anna, ich Elspet, ich Angnes und ich Dorothee, all geswistred, Ullreichs in der Lad saligen kinder unser willig dinst. Genadiger herre, wir tun ewrn gnaden ze wissen, das wir unser sechstail, so wir gehabt haben an dem gut an der Scheiben, gelegen in Gewoltzchiricher pharr, verkauft haben Wernharten von Talhaim und seiner hawsfrawn und erben. Bitten wir ewr gnad, ir wellet im dasselb sechstail verleihen und bestatten, das ist unser gutleich will und vleizzgew pet, und sult ir und ewr gotzhaws des alweg unengolten beleiben. Mit urchund des brifs versigelt mit des erbern weisen Otten des Asenhaimer aufgedrukchten insigel, den wir all mit vleizz darumb gebeten haben, im und seinen erben an schaden, der geben ist nach Christi geburd viertzehenhundert jar, darnach in dem ainsundzwaintzigisten jar an suntag als man singet Reminiscere in der vassten.