Ich langer Fridel in der Trawn meyn hausfraw^e und all unser erben vergehen o^effenleich mit dem brief allen den, so er fu^erpracht und geczaigt wirt, daz wir mit wolbedachtem mue^et und veraintem willen recht und redleich ze chawffen gegeben haben dem erwirdigen geistlichen herrn abbt Symon ze Lambach und seynem gotshaws daselbs allew unsrew recht, so wir sy^e gehabt haben auf der mu^el ze Hunthaken in Gaspoltshofer pfarr gelegen, dy unser erb von dem vorbenanten gotshaws gewesen ist, und dy wir versatzt haben Chunrat dem Mu^elner ze Hunthaken fur zwelff phunt phenning als der satzbrief lawt und weyset, den er von uns darumb hat, die selbigen losung und ubertew^erung und allew unsrew obgenanten recht haben wir ze chauffen gegeben unserm egeschriben gnedigen herrn zu seynen rechten, dye er und seyn egemelts gotshaws vor darauff gehabt habendt mit allen ern, rechten und nu^etzen als von alter zu der obgenanten mu^el gehort, wie daz genant ist, nichts ausgenomen, umb eyn gelt, des wir von im zu rechten ta^egen gericht und gewert seyn an allen schaden. Wir sein auch des obgenanten chawfs seyn und seins egenanten gotshaws gwa^er und fu^erstand also chawffs nach des lands recht ist ob der Enns angever, und des alles zu urchu^end geben wir im und seinem vorbenanten gotshaws den brief, besigelt mit der erbern anhangunden insigeln Hainreichs des Rue^ezz ze Lambach, und Hansen des Rathaymers da selbs, die wir baid darum fleissichleichen gebeten haben zu eyner za^ewgnu^es in und allen irn erben an schaden, das under ich mich obgenanter Fridl mit sampt mir mein hawsfraw und all unser erben mit unsern trewen in aydes weiz verpinden, alles das sta^et ze haben, daz oben an dem brieff begriffen und verschriben ist, der gegeben ist nach Cristi gepu^ert vierczehenhundert jar, darnach in dem virden jar des na^echsten su^entags vor sand Agnesen tag der hailigen junkfrawen.

Source Fulltext: StiAL, Kopialbücher, HS 16, P. Augustin Rabensteiner OSB: Documenta monasterii Lambacensis Bd. I, ab anno 992-1415, S. 532f, Nr. 445