Wir Chunrad von Gots genaden abt Hainreich prior und der convent gemainichlich des chlosters ze Chremsmunster sand Benedict ordens Pazzawer bistům verjehen, . . . daz di hochgeborne fůrsten unser genadig heren hertzog Rudolf hertzog Friderich hertzog Alber und hertzog Lewppolt von Osterreich unser und unsers gotzhaus recht heren und vogten sind und sein sullen, wann auch der egenant unser herre hertzog Rudolf uns und unserem gotzhaus alle die freyhaite und hantveste die wir von selig gedechtnuzze seinen vorvarn gehabt haben besta^ett und vernewt hat, und uns und unser gotzhaus mit sundern gnaden gunstlich furdert, so sein wir suldig und gepůnden daz wir in daz mit sunder gůttat und andechtigen werhen widerchern, darumb loben und verhaizzen wir fur uns und unser nachkomen, daz wir alle jar die weil der egenant unser herre hertzog Rudolf lebt auf aller heyligen abent ain ampt haben suln umb hail der lebentigen, wenn er aber von diser werlt geschaiden ist daz Got lang wend, so suln wir alle jar auf den tag seines todes begen seinen jartag mit messen mit vigilien selvespern und mit anderen gebeten und gůttaten alz wir die begehen unsern stifftern, auch verhaizzen wir in dem namen als vor, wenn der tům ze sand Stephan chirichen ze Wienn aufgericht wirt, daz wir denn alle jar aim probst daselbs sechtzig důrrer und gederter vorhen, und virtzig und hůndert auch gederter vorhen den chorheren aws unserm Alberse raichen und dienn suln auf sand Michels tag an all widerred und verzichen, und des ze urchund und sicherhait haben wir disen brif mit unserm und des vorgenant abtes und convents anhangunden insigeln versigelt, der geben ist ze Chremsmunster am freytag vor dem heiligen phingsttag da man zalt von Christs gepurd drewtzehen hundert jar darnach in dem zwai und sechtzigkistem jare.

Source Fulltext: OÖUB 8 (Wien 1883) S. 84, Nr. 83